Sha ki 3 ngut ki MLA pynpoi ka KSU ïa ki mat jingdawa jong ka seng ..

Mawkyrwat, Nailar 21: Ka Khasi Students’ Union (KSU), South West Khasi Hills District Unit, mynta ka sngi ka la pynpoi ïa ki mat jingdawa jongka seng sha u MLA ka Mawkyrwat Constituency, Bah Renikton Lyngdoh Tongkhar, bad sha u MLA ka Mawsynram Constituency, Bah Olan Sing Suin. Ka seng kan sa pynpoi ruh ïa kine ki juh ki mat jingdawa sha u MLA ka Ranikor Constituency, Bah Pius Marweiñ ha kine ki sngi ban wan.
Ka seng ka pynpaw ba namar kine ki MLA ki don ha ka liang synshar bad ki dei ki nongmihkhmat jong ki paidbah na kane ka thaiñ, kim dei ban long tang ki nongpeitkai halor kine ki mat jingdawa. Ka seng ka kyntu ïa ki MLA jong ka South West Khasi Hills District bad ïa u MLA ka Mawsynram Constituency ban kren bad ban pynbor ïa ki paralok jongki ha ka sorkar MDA-II, naduh u Myntri Rangbah ka jylla, ba dei ban shimkhia bad pynurlong noh ïa kine ki mat kiba ktah bad kiba la pynkhih ïa ka Ri Khasi-Jaintia hi baroh kawei.
Ka KSU South West Khasi Hills District Unit lyngba kane ka kyrwoh ka kren shai ba watla ki nongïalam ba shakhmat jong ka Central Executive Council (CEC) jongka seng ki dang shah kem, hynrei ki Unit bad ki Circle hapoh ka South West Khasi Hills District kin dang ïai buddien ïa ki nongrim bad ki mat jingdawa jongka seng haduh ban da urlong, hapoh ka jingïalam bad jingïaid lynti jong ka KSU CEC.
Ki san tylli ki mat ki long: Ban pyndam noh ïa ka Public Hearing jong ka Shree Cement, bad ban suspend shipor ïa u Deputy Commissioner (DC) bad u Superintendent of Police (SP) ka East Jaintia Hills District, kumjuh ruh ïa ki ophisar jong ka Meghalaya State Pollution Control Board (MSPCB), bad ban sdang ïa ka departmental proceeding pyrshah ïa ki ophisar kiba don bynta.
Ban pynurlong noh ïa ka Meghalaya Residents Safety and Security Act, 2016, da kaba pyntreikam hok ïa ki kyndon jong ka aiñ.
Ban pynurlong ïa ka jingpynkylla ïa ka Meghalaya Identification, Registration (Safety & Security) of Migrant Workers Act, 2020, kumba la dawa da ka seng.
Ban pynbeit ïa ka rukom thungkam jong ka NEIGRIHMS, katkum ki kular bad jingpynbna kiba la ai paidbah mynshwa.
Bad ban wanrah ïa ka rukom thungkam kaba khuid, kaba shai bad kaba hok, kaba kynthup ïa: ka jingpynduh noh ïa ka Personal Interview ha ki recruitment, wanrah ïa ki jingpynkylla ha ka rukom treikam jong ka MPSC bad DSC katkum ki jingai jingmut jong ka seng; bad thaw ïa ki Standard Operating Procedures (SOPs) kiba shai na ka bynta kiwei pat ki Recruitment Boards.
Ki kynhun jong ka seng kiba la pynpoi ïa ki mat jingdawa: kawei ka long ha u Bah Olan Sing Suin, MLA Mawsynram Constituency ha kaba ïa ka kynhun la ïalam da u Jiedskhem Nongsiej, General Secretary, KSU South West Khasi Hills District Unit.
Ha ka jingleit Ïakynduh ïa u Bah Renikton L. Tongkhar, MLA Mawkyrwat Constituency la ïalam da u Plosborlin Kharjahrin, Environment and Cultural Secretary, KSU South West Khasi Hills District Unit, ryngkat bad u samla Rutherford Lyngdoh, General Secretary, KSU Mawkyrwat Circle, bad kiwei kiwei ki nongïalam jong ka seng.