Ai khublei ka MGPSTA ïa ka sorkar halor ka jingpynskhem ïa ki nonghikai skul sorkar

By Mawphor Editor On Jul 28, 2022

Shillong, Naitung: Ka Meghalaya Government Primary Schools’ Teachers’ Association (MGPSTA) ka ba dei ka seng jong ki nonghikai skul sorkar (Govt. LP School) ha ka kyrdan Primary School ha u kyrwoh lyngba u Bah D.Rani, General Secretary ka pynpaw ka jingsngew nguh bad ka jingkhublei ka ba kyrpang ïa ka sorkar MDA ha ka jingïalam jong u Conrad Sangma ha ka ba ha ka cabinet ka ba la long ha ka 26 tarik mynta u bnai ka la pynskhem ïa ki nonghikai skul sorkar ki ba hikai ha ki Govt LP School.
Ka Seng ka pynkynmaw ba ka sorkar ka la shim ïa ka 2nd June 1994 kum ka sngi shimti (taking over) ïa ki skul Lower Primary na ki District Councils.Ki don katto katne ki nonghikai ki ba thung shwa ka snem 1994 la thung ïa ki kum ki non Govt teachers ha kine ki skul ki ba donkam ban regularise.
Hadien ka snem 1994 ka sorkar ka la thung ïa ki nonghikai da ka ba pynlong ïa ki interview bad don ruh ki ba la jied ne interview da ki managing committee ban pyndap ïa ki jaka ba thylli.Hynrei watla la pyndep ïa kitei ki kyndon bad la thung halor ki post ba pynmih da ka sorkar (sanction post) ne ki post ba thylli (vacant post) hynrei ha ki shithi thungkam (appointment order) ki pynpaw ba la thung Adhoc Basis ka ba khlem pynthymmai shuh ïa ki appointment order.Kitei ki nonghikai ki ïoh tista ia ka tulop man la u bnai bad ki ïoh ïa baroh ki jingai jingsiew bad kumjuh ruh ynda la shongthait yn shem jingeh ban ïoh ïa ka pension namar khlem regularise ïa ka service.
Halor kane ka jingeh ka Seng jong ki nonghikai skul sorkar ha ka shatri jong ka MGPSTA ka la thoh la bunsien sha ka sorkar lyngba ka tnat pule puthi.Ha ba ka sorkar MDA ha u bnai Lber 2022 ka la regularise ïa palat 3000 ngut ki nongtrei sorkar ki ba la thung Adhoc basis ym shym la kynthup ïa ki nonghikai ha katei ka 3000 tam.
Na ka liang ka Seng ka la ong ba ka la thoh ruh da ka shithi bad leit ïakynduh ia u A.Ch Marak, Director of Schools Education and Literacy & Secretary Education Department, u BDR Tiwari Commissioner Secretary Education Dept, Bah DP Wahlang Additional Chief Secretary Edu.Dept, Kong R.Suchiang Chief Secretary ki ba long ki ophisar jong ka sorkar jylla.
Shuh shuh ka Seng ka la ong ba seng ka la thoh bad ïakynduh ruh ïa u Ba L.Rymbui Myntri ka tnat Education bad ia u Myntri Rangbah (CM) ka jylla u Conrad Sangma.Kumba ki la kular, kumta ruh da ka jingkmen ki la ïohi ia ka khubor ba ka cabinet ha ka janmiet jong ka 26 tarik mynta u bnai la regularise ïa ki 2447 ngut ki nonghikai skul LP bad UP School.
Kumta na ka liang ka seng ki nonghikai MGPSTA ka ai ka jingkhublei ka ba kyrpang ïa ka sorkar MDA ha ka jingïalam jong u Conrad Sangma kum u myntri rangbah bad u Bah L. Rymbui Myntri ka tnat pule puthi ki ba la pynurlong ïa kane ka jingdawa ka jong ki.
Shuh shuh na ka liang ka Seng ka ai khublei kyrpang ruh ïa ki ophisar bad ki nongtrei jong ka tnat pule puthi naduh ki SDSEO, DSEO, Directorate of Schools Education & Literacy, Education Dept ki ba la trei shitom na ka bynta kane ka kam.Ka Seng ka ai khublei kyrpang ruh ia u Bah DP Wahlang, IAS, Addl CS Edu. Dept kum u ophisar ba hakhliehduh jong ka tnat pule puthi u ba la shimkhia haduh ban da pynurlong ïa kane ka kam ka ba la sahkut la slem bah.