Khang pyrshah ka DS Mukhla Nongrim ïa kiba na bar ban bret pathar ïa ki jakhlia shapoh u pud ka shnong

Jowai, Naitung 27: Ka Dorbar Shnong Mukhla Nongrim ka la pynbna paidbah ba ka la khang pyrshah ïa ki briew kiba wan nabar shnong ban wan bret pathar ïa ki jhep, ki mar pyut bad ki plastic song bam bad kumjuh ïa ki Huggies khunlung hapoh u pud u sam ka Dorbar Shnong Mukhla Nongrim West Jaiñtia Hills.
La ïathuh dang ha kine ki khyndiat taïew ki nong shong ka shnong ki dang lap ïa ki briew kiba wan da ki kali Alto, Bolero, Scorpio bad ter ter ki wan na bar shnong ban leit bret ñiut shapoh u pud u sam jong ka shnong. Ka Dorbar shnong kala pyntip paidbah naduh ba pynmih ïa kane ka khubor lada ki VDP Shnong ne ki nong shong ki dang lap ïa kum kine ki jait briew te ki VDP Shnong kin bat ïa ki bad ryngkat bad ka Bor shnong kan pynshitom katkum ka ain shnong.
La kyrpad ïa ki paralok kiba wan na shnong ba kim dei shuh ban myllien ban bret shuh ïa ki jhep, ne mar pyut hapoh u pud u sam ka shnong.
Sa kawei pat na ka liang jong ka Dorbar Shnong Mukhla Nongrim West Jaiñtia ka la pynbna paidbah ba la khang pyrshah ïa ki briew kiba wan na bar shnong kiba wan shong dih kyiad hapoh kali bad ïalam kynthei ban ïa shong kai hapoh kali sha ki jaka ba kynjah bad ba dum ha baroh u pud u sam ka Dorbar Shnong Mukhla Nongrim bad lada ki VDP ka shnong bad ki nongshong ki lap ïa kum kine te ka bor shnong kan pynshitom ia ki katkum ka iañ shong.
Kane ka long katkum ka jing pyllait khubor u Rgh, S. Sari General Secretary ka Dorbar Shnong Mukhla Nongrim.