Shillong Nailar 20 : Da kaba pynpaw ïa ka jingsngewkhia ïa kaei kaba la mih na ka rally thuk thuk ka KSU, u Symbud Myntri Rangbah ka Jylla u Bah Sniawbhalang Dhar ha ka sngi Palei, ula kyntu ban pynneh ïa ka jingsuk bad ba ka sorkar ka long kaba kloi na ka bynta ban ïakren ban ïa pynbeit lang ïa ki mat jingdawa jongka KSU.
“Kane ka jingjia ka long kaei kaei kaba sngewsih bad ka bym lah ban pdiang da ka Sorkar Jylla. Nga kyrpad ïa ka KSU bad ïa baroh ki kynhun bad ki paidbah ka jylla ban pynneh ïa ka jingsuk. Lada don ïa kino kino ki mat, ka jingkhang jong ka Sorkar ka dei kaba plie beit na ka bynta ban ïakren” ong u Bah Dhar.
Ula ong, ba ka sorkar ka la shim khia ïa ki mat jingdawa jong ka KSU bad shen kan sa ïakynduh noh bad ki.
“Ngi lah ïohi ïa ki jingdawa ki jongki. Ai ba kin wan shwa ban ïakren, ngi lah long kiba kloi. U Myntri Rangbah ka Jylla bad u Bah Wailadmiki Shylla hynin ka sngi ki lah dep ban kren da kaba shai kdar ba ki long kiba kloi ban pdiang ïa ki na ka bynta ban ïakren. To ngin sa ïa peit ha kine ki shi sngi ne ar sngi” ula ong.
Haba kylli la ka sorkar kan khot ïakren ïa ka KSU, ula ong ba ïa kane ka mat, yn sa rai tang shu wan phai Myntri Rangbah na Delhi.
“U Myntri Rnagbah um don hapoh ka jylla. Ai ba un wan shwa, ngi ngin sa shim khia ïa kane ha ka rukom kaba dei. Kam don kano kano ka jingkylli jong ka jingpynslem ban khot ïakren noh ïa ki” ong u Bah Dhar.
Ula maham ba kano kano ka jingleh kan pynmih beit ïa ka jingpynphai kylla bad ula kyntu ïa ki samla pule ba kin burom ïa ka aiñ.
Ha kaba ïadei bad ka jinglong jingman kaba la jia ha Assam, u Bah Dhar ula ong ba baroh ar ki Sorkar Jylla ki la don ïa ka jingïakren.
“Baroh ar ki Sorkar ki lah dep ban ïakren. Ym ha ka kyrdan ka jong nga, hynrei ha ka kyrdan jong u Myntri Rangbah bad tnad kam pohïing, ki lah dep ban ïakren. Baroh arngut ki Myntri Rangbah bad ki Myntri Kam Pohïing ki dang don ha ka kam, shen ïa kine kiei kiei baroh yn sa pynjai jai biang noh” ula ong.
U Bah Dhar ula bynrap ba ka KSU ka la dep soi ïa ka jingïatehkular ne Undertaking ha u Deputy Commissioner ba ka jingpynlong ïa ka Rally kadei ban long kaba jai jai bad ka sorkar kan sa khmih bniah kumno ban pynbeit ïa kane ka mat.
