Sngewkhia ka KSU-NC ïa ka jingwan kyndang bad rongtuh ki suba Bangladesh na kawei ka ïing ha Dona Bhoi EJHD

Khliehriat, Nailar 20: Ka Khasi Students Union -Narpuh Circle ba la lam khmat da u President, u samla Samla Phanuel Tongper, tang shu ioh jingtip ba ka la don ka jingshah kyndang bad shah rong tuh ki tiar ki tar na kawei ka longïing kaba don ha Dona Bhoi, East Jaiñtia Hills District, marmar ma u lem bad ki dkhot ki la leit sha katei ka jaka bad la lap shisha ïa kane ka jingjia shah lute ka long ïing u bah Sarthe Teron uba dei ruh u Waheh Shnong barim jong ka shnong Dona Bhoi.
U samla Phanuel Tongper lyngba u kyrwoh u la iathuh ba ” Ha ka jingjurip, ka seng la lap bad sakhi, ba ka biar ïing kaba kah da ka tin na sahdien ïing kala peit namar ka jingshah ot kaba tang kat ban ngiam briew ban rung bad ki jingdon jingem ha ïing u bah Sarthe Teron la shah khynra bad la saphret lut ki tiar ki tar bad haba kylli bniah na ki trai ïing, ki la ïathuh ba kane ka jingjia ka lah ban dei ha ka por kumba 3.00 baje dang step phyrngap ha ka por ba dang dum namar ha kata ka por ka la don ruh ka jingduh bor ding bad u slap ruh u jur bha bad ki don san ngut hapoh ïing kynthup naduh u kpa bad ka kmie lem bad lai ngut ki khun kiba dang rit, ki khun ba dang rit ki dang ioh thiah lyngngai ha ka por ba jia. Shuh shuh la ïathuh ba mar sien rung kita ki briew imat ki ïa don haduh kum ba san bad hynriew ngut bad la suba jur ba ki lah ban dei ki nong Bangladesh, uwei napdeng jong kita ki runar, ula pyn-ap da ka wait na ryngdang u kpa ka ïing bad kiwei pat ki la teh la khum la teh ïa u kpa ka ïing da u tyllai nylon la teh ïa baroh ki kti bad kjat jong kitei ki lanot bad kpa bad kmie kiba dei ki trai iing bad ki runar ki la byrngem ban pyniap lada ki hylla briew, kumta ki nongtuh ki la sdang ban khynra ïa ki jingdon jingem hapoh ïing, ki la ioh rong tuh ia ka Mobile Smart phone, ki jaiñ ki nep kiba dang thymmai, ki la pynjot bad pynjulor ruh ia ka almari ba buh ïa ki kot ba donkam, ki la ring tuh ruh ïa ki ki plakot skul jong ki khun bad ka pisa kaba don kumba 30 hajar tyngka. Mar sien dep nangta ki la bthat bad byrngem ïa ki trai ïing ban pynkhreh kham bun ka pisa namar ba kin sa wan biang ha kawei ka sngi, kumta ki la phet noh bak. Hadien ba la phet kita ki suba nong Bangladesh, mar-mar u kpa ka ïing u la pyrta briew ban iarap bad kumta ki briew nong shong shnong ki la ïa poi bad bud dien ïa kita ki nonglute hynrei ym iohi bad ym lap dien shuh namar ba ki la phet sha ka phang ba don ka jingker khappud lane Border Fencing Bangladesh”
Ka seng KSU-Narpuh Circle ka pynrem jur ïa kane ka jingleh ki runar ba suba ba ki dei ki nong Bangladesh bad ka seng ka pynpaw ka jing bynñiaw ruh kum kine ki jingjia shah lute, shah pyniap ki nongshong shnong kiba sah ha ka thaiñ khappud bad ka ri Bangladesh ki ju jia man u snem bad dang mynshem snem ruh ha u bnai jymmang 2025 ka la jia kum kane ka jingshah lute bad shah byrngem kawei ka longkmie na Shnong Umkiang, ha ki khar Bangladesh, ka seng ka pynrem jur bad kam kwah shuh ban iohi kum kine ki jingjia shah lute, shah pyniap ha ki ‘riew suba nong Bangladesh bad ka seng ka dawa jur ruh ïa ki bor pahara jong ka Border Security Force (BSF) ba ki dei ban peit bha ïa ki khappud Indo-Bangla (International Border) ban long peit ngor bad ai ka jingiada kaba pura ïa ki nongshong Shnong kiba sah ha khappud, khnang ban nym bteng shuh ki jingjia kiba sngewsih kum kine”
Shuh shuh na ka liang u trai ïing, u bah Sarthe Teron, uba shong ba sah ha Dona Bhoi, East Jaiñtia Hills District, mynta ka sngi u la ujor da ka ejahar ha Umkiang Patrolling Post, u la ujor halor katei ka jingwan rung tuh bad lute bad jingbyrngem ki runar kiba la suba ba ki deiki nong Bangladesh.
U bah Sarthe Teron u la iathuh ba hadien ba ki runar ki la phet u la pyrshang ban law ban loit ïa ki tyllai ba la teh la khum ïa u bad pyrta bad khot pan jingiarap na ki para shnong ba sah mar jan, u la ong ka kane ka jingjia ka la pyntieng, pynsuhjer shi katdei eh ïa u, ïa ka kurim bad ïa ki khun, u kyntu ruh ïa ki bor pulit ba kin sngewbha ban shim khia ban pahara bha ha kane ka thaiñ namar kaba kum kane ka jingjia ka lah ban jia biang ha kano kano ka por.