Pyndam noh ki bor pynïaid Distrik ïa ka jingailad ban pynlong shongkyllaiñ myngor ka KSU

Shillong, Nailar 20: U Deputy Commissioner ka East Khasi Hills District u Abhilash Baranwal, IAS u la ong ba ïa ka jingbit kaba la ai sha ka KSU ban pynlong ïa ka jingïakhih shong kyllaiñ mungor la sngi Thohdieng ka 21/Nailar/2026 ha Khyndailad la pyndam noh na ka daw ba la mih ki jingklumar na ka jingïaid paidbah na ka bike rally kaba la long ha ka sngi Balang.
Ka sorkar Meghalaya ka ngeit ha kata ka jingsynshar paidbah bad ki nongshong shnong ki don ïa ka hok ban pynpaw ïa ka jingpyrshah ka jong ki bad ha kane ka kynti kaba mynta ki la pan jingbit ban don kata ka jingïaid paidbah kaba jai jai, kumta ka sorkar ruh ka kwah ban ai lad, ong u DC.
“Wat la katta ka don ka jingsngew, dei na katta ka daw la buh ïa ki pulit ban pahara ha ki jaka jaka bad baroh ki don 200 ngut eiei, hynrei namar ka jingjrong ka lynti don ki jaka ba duna ki la shim kabu ïa kata bad kiba la thikna ki don16 ngut ki briew kiba la shah shoh,” ïathuh u DC.
U Deputy Commissioner ka East Khasi Hills haba kren ha ki lad pathai khubor u la ong ba ki bor jong ka District ki la ai jingbit ban ïaid paidbah halor ki kyndon kiba pyrkhing bha ba kin sdang na Jaïaw ha ka por saw baje bad ïaid sawdong ka sor Shillong.
Na ka liang jong ka sorkar ka la pan san kompany ka kynhun jong ki pulit CRPF bad ki kynhun pulit Rapid Action Force, ryngkat ki pulit district ba kin pynthikna ba kan nym don shuh kano kano ka jingjia bad lada don kiba kwah ban shim ïa ka ain ha ka kti kin ngat ha ki kyndon ka aiñ bad la kyntu ïa ki paidbah ban don ka jingïatreilang.
Haba ïadei bad ka jingjia ha ka 19/Nailar/2026 la dep ban ujor da ka ejahar bad ka jingtohkit mynta ka dang ïaid, ym lah ban ong ka dei na kano ka liang bad ka jingtohkit kan sa kren ïa kiei kiei baroh, u la bynrap.
Ula ïathuh ba ha ka por ba ki pulit ki leit sha ophis ka KSU ha Jaïaw la don ba kawang petrol bom, ha kane ka jingjia ki pulit kila pyndon kam uwei u stun grenade bad siat ïa ki tyngdong pynsat khmat ban pynpra ïa u paidbah kiba pyrshang ban tur sha ki pulit ha katei ka por.