Ki bar jylla da ka dor trei kaba rit ki knieh lut ïa ki kam bylla ki trai muluk: AMLA

Nongstoiñ, Nailar 18: Ka All Meghalaya Labour Association Sengkmie ka la pynpaw ïa ka jingsngewdiaw halor ka jinglong jingman ka kam bylla kam sngi ha kine ki sngi, namar la ong ba ki bar jylla da ka dor kaba rit ki knieh lut ïa baroh ki kam bylla kam sngi jong ki trai jaka trai muluk.
Ki nongïalam ka synjuk haba ïakren bad ki lad pathai khubor mynta ka sngi ha Nongstoiñ, ki la kynnoh ba ïa ki kam baroh wat ïa kiba dang lah ban trei ban ktah da ki para Ri ne ki trai muluk, hynrei ha kine ki sngi suki pa suki mynta la sdang ban shah knieh lut ha kiwei pat ki briew kiba na bar jylla.
U Bah Newsonroi Syiemiong President ka All Meghalaya Labour Association Sengkmie, u la ïa wer ïa ki trai shnong trai muluk, ba kin wan shakhmat ban ïasnohktilang bad ka seng, khnang ba kan ym wanrah kano kano ka jingeh ne ka jingkyrduh kam ha kum kane ka juk kaba hiran ha ka kamai kajih.
U la ong ruh ba ki don shibun ki kyndon kiba ïadei na ka bynta ka jingmyntoi ki Labour, tangba ym pat lah ba tip la haduh katno ka sorkar ka la pyntyllun ïa kita ki kyndon, kumta ka seng shen kan sa leh ïa kaba donkam hadien ba la wad ïa ki jingtip.
Katba na ka liang u bah Dany Dunai Nongaibuit ka seng All Meghalaya Labour Association Sengkmie, u la ong ba ïa kane ka kynhun la seng khnang na ka bynta u kup shilliang sem shilliang naduh u snem 2019, da ka jingthmu ban ïada ne ïakhun ïa ka hok ba ki trai muluk kin ym shah ñion ha ki kam ki jam kiba ki trei.
Kine ki kam ki lah ban long ha ki karkhana, ki jingtei ïing ne kino kino ki kam la kiba rit ne kiba heh. Hynrei kaba sngewsih ka long ba ki bar jylla ki kloi ban trei ha ka dor kaba rit bad ki pynhun ïa ki trai. Pynban ki trai muluk ki leh kumba leh ki bar jylla, namarkata ka seng haba ïadei bad kane kan sa hiar sha man la ki kyndong kynshrot jong ki thaiñ ban ai jinghikai ïa ki trai muluk lym kumta ka jingma ka la ap ha khmut.