Shillong Nailar 18: Ka Sorkar Meghalaya ka la thied ïa ka jaka kaba 96 akar ha Rongalgre, East Garo Hills, ka ban long ka jaka kaba shirta ban pynlong ïa ka Me’gong Festival kaban don ruh ïa ka jingshna pyninam ïa ki shnong jong ki Khasi, Jaintia bad Garo ban ailad ïa ki nongjngohkai ba kin mad hi dalade ïa ka jingim jong ki paid riewlum.
U Myntri Rangbah ka Jylla u Conrad K Sangma ula pynbna ïa kane ka projek hynne ka sngi Baar haba kren ha ka jingplie ïa “Ki Dienjat – Revisiting the Roots” ha Taraghar State Guest House.
“Shen, hooid watla kane ka dang dei tang ka jingthmu ban pynwandur ne Planning Stage, hynrei nga sngewkmen ban pyntip ba ngi dang shen ngi lah thmu ban don noh ïa la ka jong ka jaka na ka bynta ban pynlong ïa ka Me’gong Festival ha ka jaka kaba khot ka Rongalgre ha East Garo Hills,” ong u Sangma.
“Kumba 96 akar ka jaka lah dep ban thied bad ngi lah sdang ïa ka kam. Ha katei ka jaka, ngi lah pyrkhat ban buh ïa bun tylli ki shnong jong ki jaidbynriew ki bapher bapher ki jong ngi” ula ong.
U Myntri Rangbah ula ong ba katei ka jingthmu ka long ban thaw ïa ka jaka kaba don kyrhai da ka kolshor kaba ki nongleitkai ki lah ban sah kum ki jaidbynriew haba ki leit jngohkai.
Related Posts
“Ka jingthmu ka jong nga, ka long haba ki briew ki leit sha ka Me’gong festival, kin lah ban leit bad sahkai ha ka shnong Khasi. Haba phi leit hangtei, kin don ki briew kiban riam bad phin ïoh ruh ban riam kum u Khasi. Phin sah hangtei kum u Khasi uba sah ha ki shnong ki thaw bad phin ïoh mad ha baroh ki liang kumba long ka shnong Khasi bad ka kolshor, da kaba sah hangtei” ong u Sangma.
Ula bynrap ba ïa kum katei ka shnong kan don ruh na ka bynta kiwei pat ki jaidbynriew. “Kumjuh ngin don ruh ïa ka shnong Garo, Ngi don ïa ki nong Jaintia, Pnar, War — jer phi ïa ka kyrteng kat kaba lah. Ngin don ïa ki shnong ki bapher bapher ha katei ka jaka, khnang ba ngin lah ban ailad ïa kiba wan kai bad ki nongjngohkai kiba wan na kylleng ki jaka ba kin shemphang” ula ong.
Da kaba pynïasoh ïa kane ka projek bad ka Cultural Policy ka Jylla, u Sangma ula ong ba kum kine ki sienjam ki long kiba kongsan ban pynneh ïa ka jinglong tynrai hapdeng ka jingkylla sted jong ka por.
“Ka daw balei ba ngin leh ïa katei, ka dei namar ba ngi lah ngeit skhem na ka bynta ka jong ngi bad ka imlang sahlang, ki jaidbynriew bad ka jylla, ka long kaba kongsan bha ïa ngi ban pynkhreh, ban pynïasoh bad la ka tynrai, ban lah ban thaw ïa la ka jinglong tynrai namar ha kaba kut jong ka sngi ka dei kaei kaei kaba kongsan” ula ong.
“Ka long shuh shuh kaba kham kongsan ha kaba ïadei bad ki pateng jong ki samla kiba don mynta, kiba don bynta ha kiba bun ki bynta jong kane ka pyrthei, ha kaba ïadei bad ka social media. Ka long kaba suk bha ban jah lynti noh na kaei kaba ngi long. Kumta nga sngew ba ka long kaba kham kongsan ba kum kine kiei kiei dei ban rah shuh shuh bad dei halor kane, nga kwah ba ki samla ki dei ban ïadonkti lang” la ong u Myntri Rangbah.