Yn pynkhlaiñ bad peit bniah biang ïa ki jingdonkam ha ki jaka sumar ha Byrnihat: Wailadmiki

Shillong, Nailar 18 : U Myntri ka tnad ka koit ka khiah ka Meghalaya, u Bah Wailadmiki Shylla, u la ong ba ka tnad ka koit ka khiah kan pynkhlaiñ bad peit bniah biang ïa ki jingdonkam ha ki jaka sumar ha Byrnihat, hadien ka jingbthah jong ka High Court.

U la ong ba ka High Court ka la bthah ban phah ïa ka kynhun ban leit jurip ïa ki jingdonkam ha ka liang ka koit ka khiah ha Byrnihat, bad ka tnad ruh ka la don lang ha ka jingjurip.

Katkum ka jingïathuh jong u Myntri ka jingtip ba ka tnad ka don mynta kam pyni ïa ka jinglong kaba kongsan haduh katta katta kumba la pynpaw, hynrei u la ong ba watla ki don katto katne hynrei kim dei pat kiba haduh katta katta. Watla katta ruh u la ong  ba ka tnad kan tohkit bniah ban sngewthuh ïa ka jingïapher hapdeng ki data.

Hadien ka jingjurip, ka High Court ka la bthah ïa ka tnad ka koit ka khiah ban pynbiang ïa ki jingdonkam ba kongsan, kynthup ïa ka X-Ray machine bad technician, bad u specialist na bynta ki jingpang shadem (chest specialist).

U Myntri u la ong ba ka tnad ka la dep bthah ïa ki bor ba dei peit ban pyndep ïa kine ki jingdonkam  kloi katba lah.

U Bah Wailad Shylla u la ong ruh ba ka Byrnihat ka la don lypa ïa ka Community Health Centre (CHC), bad ka sorkar ka dang pynkhreh ban kyntiew ïa ka kyrdan jong ka.

“Haduh mynta, ngim pat ïoh ïa kano kano ka sakhi kaba pynkut, namar baroh ki snem ngi la don ïa ki health facilities ha Byrnihat, kynthup ïa ka CHC, bad ngi dang thmu ruh ban kyntiew kyrdan ïa ka. Ki data kiba ngi ju ïoh kim shym la pyni ïa ka jinglong kaba palat kumba la pynpaw.”

U la pynthikna ba ka sorkar kan treikam halor ki jingbthah jong ka High Court bad kan wanrah ïa ka report kaba shai hadien ka jingpynshisha bad jingwad bniah.