La ïaid shaid shaid ki jingbishar bniah na ka bynta ki 6.5 lak ngut ki nongthep vote

Shillong, Nailar 18 : U Chief Electoral Officer (CEO) ka Jylla u Dr BDR Tiwari ula pyntip ba palat 6.5 lak ngut ki nongthep vote ka Jylla kin dang don hapdeng ka jingpynshisha kum shibynta jong ka Special Intensive Revision (SIR) 2026, haba pyntip ruh ba ki jingbishar kila ïaid shaid shaid mynta ha ki District.

Ha ka jingïalang bishar kam online bad ki Deputy Commissioner, ki ERO bad AERO ha ka Lah Sngi U Blei u CEO ula ïathuh ba ïa ki notice lah dep ban pynkhreh bad ai sha ki nongthep vote ki bym lah ban pynïadei ïa ki kot ki sla bad ka electoral roll 2005 lane don ki jingduna ha ka jinglum jingkheiñ.

Haduh 6,51,644 ngut lah dei ban ithuh, kynthup 2,22,786 ki nongthep vote ba khlem lah ban shem bad 4,28,858 ki bym ïahap ki kot ki sla.

U CEO ula bthah ïa ki bor district ban pynthikna ba kine ki notice kin poi sha ki nongthep vote ha ka por kaba biang bad ba la pynbeit ha ka rukom kaba dei ïa ka hearing khnang ba baroh kin ïoh ïa ka lad ban wan mih hakhmat ki ERO lane AERO ryngkat ki kot ki sla ban kyrshan.

Ha ka jingïalang ba ju long man ka taiew bad ki nongmihkhmat na ki seng saiñ pyrthei, u CEO ula shong bishar ïa ka jingtreikam ki Booth Level Agents bala thung ban ïarap ïa ki nongthep vote. Haduh mynta, 1810 ngut ki BLO kila treikam bad kiba bun eh ki dei na ka NPP, BJP bad VPP.

Ka jingïalang kala khmih bniah ruh ïa ka jingpynbeit ban leh eiei halor ki jingud jingnam. Ki nongthep vote ki lah ban kren sha kiba dei khmih lyngba u helpline 1950, ki mobile number lane book ïa ka call bad la ki BLO lyngba ka ECINET App.

Ban pynneh ïa ka jingtreikam kaba shai, ïa ka thup jong ki jingkam bad jingujor ba la pyndap ha ka form 6,7 bad 8 lah thep man la por ha ka website u CEO ka Meghalaya. Naba ïa ka draft roll lah dep ban pynmih, 4091 tylli ki aplikeshon kila wan ban pynrung kyrteng lang, ban weng bad pynbeit lane pynkynriah jaka.

Ki Electoral Roll Observers kila leit mynta sha ki district ban khmih bniah ba kumno la phah ïa ki notice, kumno lah pynïaid ïa ki hearing bad kumno ïa ki jingkam lah ban pynbeit. La bthah ïa ki bor district ba kin buh bha ïa ki kot ki sla bad pynthikna ba kane ka kam ka ïaid khlem ka jingpynslem.

Ula ong ba kito kiba ïoh ïa ka hearing notice kim dei ban kdat sharud ïa ka bad ki dei ban leit mih ryngkat ki kot ki sla kiba donkam.

Ka Ophis ka pynshai ba kan nym don satia ka jingweng kyrteng khlem da phah notice bad ai ka lad ban sngap ïa ki.