Nongstoiñ, Nailar 18: Ka Dorbar shnong Ktiehthawïar kawei na ki shnong ha ka thaiñ Langpih, ka la pynshai paidbah haba ïadei bad ka jingleit ot ïa ka Bording jingshai haïing jong I kong Skinly Wanniang, ha kaba na ka liang ka shnong ka la kam ruh ba ka la ot shisha ïa ka bording jong ki, na ka daw ka jingleh donbor u bah Pynshlur Marweiñ u ba dei u pyrsa kurim jong katei ka ïing.
Ha ka jingïakren bad ki nongthoh khubor ha Nongstoiñ, u Bah Albinus Langrin sordar ka shnong Ktiehthawïar u la ong ba ka shnong ka la leh ïa katei ka kam da kaba la shim rai lang ruh da ka shnong baroh kawei.
U la ong ba katei ka ïing ka la rah ïa ka bording elektrik na la ïing jong ki sha ka Kharkhana otdieng bad Karkhana shna tyre. Ka Karkhana ba ki rah ïa ka bording electric ka la dei shabar shnong bad kam dei shuh hapoh u pud u sam jong ka shnong Ktiehthawïar. Nalorkata, ka jingjngai ka Karkhana ba ki trei na u post lait ka la palat ïa ka 400 meter ei ei.
U Bah Albinus u la bynrap ba ka shnong bunsien ka la ïoh ïa ki jingujor na ki trai kper ba ki pynpur beaiñ ïa ki waïar bad ha ka por ba pyndonkam ma ki ïa ka Karkhana, ki bol lait ki sniew noh bad ka lait ruh ka khih. Kane ka la pynthut ïa ki khun haba khreh kot, kumta lyngba ka jingpyndonkam jong ki, ka ktah ïa baroh kawei ka shnong bad ka pynap jingma ruh ïa khynnah bad ki khunlung, namar ka jingjngai palat u waïar na u post lait ba ki shu pynpar pathar ha ki madan.
Haba pynkut ïa ki jingkren, u la ong ba ka shnong ka la ïathuh ruh ba haba ïadei bad kita ki kynrum kynram, ka shnong ka la leit mih bunsien sha ophis jong ka MePDCL bad la ai ruh wat da ka jingthoh hynrei ka shnong ka khlem pat ïoh jubab ei ei.
Mynta ka sngi 18 tarik Nailar 2026, ka shnong ka la leit ai jingthoh ruh sha ki bor jong ka aiñ ha u Incharge BOP Langpih, West Khasi Hills District ban tuklar lem ïa katei ka kam.
