Kem ki pulit ka SWGH ïa u rangbah ba 53 snem ryngkat bad u kynja ba 1.439 kilo

Ampati, Nailar 18: Ki pulit ka South West Garo Hills ki la kem ïa u wei u rangbah ba 53 snem ka rta hadien ba la kynnoh ba na u la kurup 1.439 kilo u kynja ha ka jingkhynra naka ha Jhunjhuni Tri-junction ha ka sngi Ba-ar.

Ïa kane ka jingkhynra la leh da ki pulit jong ka Kalaichar Police Post, kiba la khanglad bad talasi ïa uwei u briew uba suba ha ka por ba ki leh ïa ka jingkhynra, la ïathuh ki pulit.Une u briew u dei uba la tip kyrteng kum u Abdul Zaher uba shong ba sah ha Jhagarchar, Kakripara, Mankachar.

Ki pulit ki la ïathuh ba la buh hapoh ka custody ïa u Zaher bad la sdang ruh ïa ka jingtohkit katkum ka Narcotic Drugs and Psychotropic Substances (NDPS) Act.

Ki pulit ka South West Garo Hills ki la ong ba kane ka jingioh kurup ka long shi bynta ban khanglad ïa ka jingkhaïi drok ha kane ka thain bad ki la kyrpad ïa ki paidbah nongshong shnong ba kin ïasam ïa ki jingtip halor ki kam be-ain kiba suba don jingiadei bad u drok sha ki thanat ba jan tam.