Shillong, Nailar 14: Ka jingïaknieh nongialam ha Hima Mylliem ka la kylla drama biang ha ka sngi Thohdieng ha kaba u Acting Syiem, u Bah Alban Fredrick Syiem u la wanphai biang sha ka ophis jong u Syiem ha Mawkhar, shisngi hadien ba u la pynlait ïa ka kamra hadien ka jingmaham kaba tyngeh na ka Meghalaya High Court.
Kane ka jingjia ka la wan jia tang hapoh 24 kynta hadien ba ka High Court ka la maham ba ka jingbym kohnguh ïa ka hukum jong ka ban thung biang ïa u Ainam Manik Syiem kum u Syiem ba pura jong ka Hima Mylliem bad ka lah ban khring ïa ka jingshah pynshitom pyrshah ïa u Acting Syiem.
Ki jingjia ki la iaid naduh ka por mynstep ha kaba u Alban ryngkat bad katto katne ngut ki Myntri bad ki Bakhraw ki la poi ha ka ophis ka Hima ha Mawkhar bad u la pyndonkam ïa baroh ar tylli ki kamra jong u Syiem bad ïa ka ophis jong u Syiem Khynnah (Deputy Syiem).
U Ainam Manik Syiem uba la shah weng noh ïa ka jingshah sospon jong u da ka High Court ha ka 11 tarik u Nailar, hadien u la wan poi ryngkat bad ki nongkyrshan bad ki Myntri ban shimti biang ïa ka kam.Hynrei wat hapdeng ka hukum jong ka ïingbishar ban pynphai biang ïa u ha ka kam, um shym la lah ban shim ïa ka kamra jong u Syiem namar ba u Alban u dang ïai bteng ban don beit hapoh.
Ha ka jingjia kaba pher, u Ainam ka la rung shapoh ka kamra ha kaba u Alban u shong.La iathuh ba u Alban u la ieng, u la khublei ïa u bad u la aiti ïa ka kot shwa ba baroh arliang kin sahkut ha ka juh ka jaka jong ka ophis.
Da kaba ym don dak ba u Alban un ïehnoh ïa ka kamra, u Ainam bad ki nongkyrshan jong u hadien ki la leit sha ka jaka jingialang jong ka ophis jong ka Hima, ha kaba ki la pynlut bun ka por jong ka sngi ban shong haduh ba dap san baje.
Wat la ki nongthoh khubor ki la pyrshang bunsien ban ïoh ïa ka jingkynthoh jong ki, hynrei baroh arngut u Ainam bad u Alban ki la kyntait ban ïakren bad ki lad pathai khubor ha ka sngi Thohdieng.
Kane ka mih na ka rai jong ka High Court ha ka 11 tarik u Nailar kaba la weng noh ïa ka jingsospon ïa u Ainam bad pynduh noh ïa ka jingthung ïa u Alban kum u Acting Syiem, da kaba ong ba ka KHADC kam shym la bud ryntih ïa ki kyndon ba donkam jong ka aiñ kaba synshar ïa ka Syiem Mylliem.
Haba bishar ïa ka mukotduma (contempt petition) ha ka sngi Palei, u nongbishar H.S. Thangkhiew u la peit bniah ba ka hukum jong ka kashari ka long kaba shai bad ba u Alban um dei shuh u Acting Syiem.
Ka ïingbishar ka la maham ruh ba kito ki bym kohnguh ïa katei ka hukum ki lah ban ngat ha ki jingshah khot hi da lade ha khmat ka ïingbishar.Ia kane ka mukotduma ban shimti biang ha ka 17 tarik u Nailar.
