Khlad hashen u pulit Home Guard ba shah ban ha ki pos nar katba dang pynïaid kali ha Byrnihat

Nongpoh, Nailar 13: Uwei u Home Guard u la duh noh ïa la ka jingim hadien ba u la mynsaw jur ha ka jingjia jingïatyngkhuh kali kaba la jia hynnin ka janmiet ha surok National Highway-6, ha ka thaiñ Byrnihat.
Katkum ka jingtip bala ioh lum la ong ba katei ka jingjia ka la jia ha ka por kumba 6:35 baje eiei haka janmiet jong ka 12 tarik Nailar ha kaba kawei ka kali Pickup kaba don ïa u number AS-25-EC-3468, kaba kit ïa ki nar post ilektrik jong ka kompani Nezone, ka la shah tynrah ha kawei ka trok kaba don ïa u number AS-01-FC-9640, kaba kit ïa u eit dewiong.
Ha katei ka por, u Home Guard ba la tip kyrteng kum u Bah Megellan Sohkhlet, naka shnong Pahamsohthri, Ri-Bhoi District u dang don ha ka kamram ban pynïaid ïa ki kali. Hynrei, hadien ka jingtyngkhuh jong kitei ki ar tylli ki kali, ki nar post ilektrik kiba la kit ha ka Pickup ki la hap bad ban ïa u, haduh ba un da mynsaw jur.
La rah mardor ïa u sha PHC Byrnihat na ka bynta ban ïoh jingïarap bad jingsumar kaba kyrkieh. Hynrei, namar ka jingmynsaw kaba jur, ki doktor ki la pynbna ba u Megellan Sohkhlet u la dep khlad noh shuwa ban poi sha katei ka jaka sumar.
Katkum ka tyllong khubor na ki pulit, ïa ka kali Pickup la ñiah da u Gandhi Kalita, uba shnong ba sah ha Pachim Boragaon, Kamrup (Metro), Assam. Hadien katei ka jingjia, la ong ba u la phet na katei ka jaka hynrei hadien khyndiat por u la leit ban pyndem hi ïa lade sha ki pulit ka Byrnihat Police Station.
Katba ïa ka trok kaba kit ïa u Coke pat la ñiah da u John Paul Khardewsaw, uba shnong ba sah ha New Nongstoin bad baroh ar tylli ki kali ki dang thmu ban kiew sha Nongpoh.
Halor kane ka jingjia, ki pulit ka Byrnihat ki la register case bad ki dang pynlong ïa ka jingtohkit katkum ki kyndon jong ka aiñ. Hadien ba la pyndep ïa ki bynta kiba donkam katkum ka aiñ, la aiti noh ïa ka met ba sah jong u Bah Megellan Sohkhlet sha ki bahaïing hasem jong u, khnang ba kin ïoh ban pyndep ïaka jinglehniam ba khatduh bad ka jingleit on tep kan long haka 14 tarik Nailar naduh ka por 2 baje ha u Lum jingtep ka Balang Presbyterian Nongpoh.