Lada dei tang ka UDP ne bad ka HSPDP ruh ngi la pynkhreh ïa ka Elekshon MP shiteng samoi : Metbah

Shillong, Nailar 12 : U President ka United Democratic Party (UDP) bad Myntri Sorkar u Bah Metbah Lyngdoh ha ka sngi Ba-ar, ula ban jur ba ka party jong u ka long kaba la pynkhreh ban ïakhun ïa ka elekshon shiteng samoi jong ka MP Lok Sabha “ryngkat ne khlem” ka jingkyrshan jong ka Hill State Peoples’ Democratic Party (HSPDP) kaba ïatreilang ha ka Regional Democratic Alliance (RDA).
Haba kren sha ki nongthoh khubor, u Bah Metbah ula ong ba ka UDP ka la dep rai ïa u kyrtong bad kala sdang ban ïaid ïalap ha man ki constituency, watla ka Election Commission kan dang pynbna ïa ka tarik jong ka elekshon.
“Ngi long kiba la pynkhreh ban ïakhun ïa ka elekshon. Ngi la dep rai ïa u kyrtong bad ngi la ïajam shakhmat” ula ong.
Haba kylli la ka rai jong ka HSPDP ban nym kyrshan ïa u kyrtong ka UDP kan ym ktah ïa ka party, u Bah Metbah ula ong ba kam ktah satia.
“Ngam don eiei ban ong halor ka HSPDP. Kane ka dei ka kam pohïing jong ki. Ngi la pynpaw ïalade kham hashuwa bad haduh mynta kim shym la wan ïakren shuh bad ngi. Hynrei ryngkat ne khlem ma ki ruh, ngi la nang jam shakhmat kum ka party” ula ong.
Halor ka jingeh ka Regional Democratic Alliance (RDA), une u President ka UDP ula ong ba ka party kala ïaid hi marwei. “ïa mynta, ngi la ïaid marwei, ym hapoh ka lama jong ka RDA. Ka dei tang ka UDP marwei” ula ong.