Shillong, Naitung 25 : Ka Committee on Women Empowerment jong ka Iing Dorbar Thawaiñ ka jylla ha ka sngi Nyngkong ka la pynpaw ïa ka jingsngewkhia halor ka jingnang kiew ki kam bymman ïa ki longkmie bad ki kynthei khynnah ha ka jylla.
Haba kren bad ki lad pathai khubor hadien ba la wai ka jingïalang, ka Chairperson jong ka Committee, Kong Ampareen Lyngdoh ka la ong ba ka u SP ka East Jaintia Hills u la pyntip sha ki ba ki don haduh 26 tylli ki jingjia thombor pyrshah ïa ki longkmie bad ki khynnah kiba la dep ban rejistar ha ka distrik naduh u Kyllalyngkot haduh mynta.
“Ngi la kyntu ïa u SP ba un pyntip shuh shuh ïangi ïa baroh ki jingtip kiba bniah kiba ïadei bad kitei baroh 26 tylli,” ka la ong.
Nalorkata, ka la ïathuh ruh ba la pyntip ruh sha ka Panel shaphang ka jingjia ha Jaliar ha kaba ka kurim ka la shah pynïap ha u kurim jong ka bad u kurim jong ka ruh mynta u la ïap bad ba ki pulit ki dang pynlong mynta ïa ka jingtohkit.
Haba ïadei pat bad ka jingjia ha Nongrah kaba arngut ki shipara ki shah pynïap ha u kpa jong ki, ka tei ka nongmihkhmat ka la ïathuh ba ka jingsiew ïa ka bai luksan kaba long 5lak sha katei ka longiing ka la ïaid shakhmat bad la khmih lynti ba hapoh 10 sngi yn pyndep noh.
“Ka jingïaid ka jingtohkit ruh ka long kaba ïaid biet namar la pyntip ïangi bad ki pulit ki la ïaid shakhmat haba ïadei bad ka jinglum ïa ki sakhi sabut kaba ïadei bad ka jingduh ei jong ki ar tylli ki mynsiem briew,” ka la bynrap biang.
Ha kajuh ka por, u MLA ka Mawsynram ba dei ruh u dkhot ka Committee u la ong ba ki la bthah ïa ka Social Welfare Department ba kan shimkhia ban peit wat ïa ka jinglong jingman jong ka kmie jong kitei ki khunlung bad ruh ïa ki para jong ka.
Da kaba pynpaw pat ïa ka jingbynniaw halor ka jingjur palat ka jingarmet ki khynnah ba dang ha ki khat snem, ka Chairperson ka la ong ba ki la kyntu ïa ka tnad pulit, ïa ka social welfare department, ka social welfare, ka women’s commission, ka child protection Commission ba kin ïa wan lang bad ïakhun lang halor katei ka bynta ha baroh ki bynta jongka jylla.”
