Ha ka por ba armet, por ba kha khun, ba ai buiñ bad na ka jingai snam kaba don u khniang Niangkulia: Dr. Iawbor

Shillong, Nailar 11: Ka Dr. K. L. Iawbor ka Project Director Meghalaya Aids Control Society (MACS) ka la pyntip ba u Myntri ka Koit ka Khiah ka jylla u Bah Wailadmiki Shylla un sa plie paidbah kumno ban pynsngewthuh ha kaba ïadei bad ka jingpang Niangkulia ha Lady Keane College Shillong ha ka 12/Nailar/2026.
Ka Dr. K. L. Iawbor ka la ong ba kane ka Information Education and Communication ka long ban pynsngewthuh ïa ki riew paidbah, kynthup ïa ki long kmie, ki khun samla ki long kpa, ha ki skul bad ki koleij kane ka long ba kin ïoh ïa ka jingtip kaba bniah halor ka jingsaphriang jong u ne u jingpang Niangkulia uba la ïoh ban rung ha ka met jong u briew.
Ka Project Director ka la pynshai ba u jingpang Niangkulia u ïoh ban rung ha ka met jong u briew ka long ha ki saw bynta, kaba nyngkong ka dei ka jingïapoikha pathar, ka jingbym pyndonkam ïa ki lad jingïada kaba ar ka dei ka jingpyndonkam lang da u juh u thyrnia ba don ïa une u khñiang jingpang bad kito ki briew kiba dih drok.
Kaba lai ka jingpur jong une u khniang jingpang na ka kmie sha ki khun ha ka por ba armet, ha ka por ba kha bad ka por ba ai buiñ, kaba saw pat ka dei lyngba ka jingïoh ïa ka snam kaba don ïa une u khniang jingpang haba ai snam dei ban pyntikna ba uto u briew u ba ai snam u dei u ba lait na ka jingpang Niangkulia.
Kane ka jingpynlong ïa kane IEC ka long ban pynduh pyndam ïa ka jingibeiñ ne ka jingñiewbeiñ khamtam ban pynduh ïa ka jingngeit beij ha kaba ïadei bad kane ka jingpang Niangkulia bad haba la tip bniah lah ban ïada ïalade ka jingdon kane ka HIV Aids Act kaba tehlakam ïa uwei pa uwei ba ym dei ban ñiew beiñ namar kine kiba don ïa u ne u khniang jingpang Niangkulia ruh ki don ka hok ban ïoh ïa ka lad ban im bad ba kin ïoh ïa ki jingmyntoi ha ki skul ne ki koleij.
Kaba kongsan ka long haba ki briew kila sngewthuh ïa kane ka jingpang ki dei ban wan shakhmat ban test bad ban tip ha kano ka bynta u ne ka ki don, la ki don ne kim don ïa uta u khniang jingpang, lada kiba don kin shim ïa ki lad jingïada ban dih tista ïa ki dawai bad lada kim don ruh ki dei ban nang ban ïada ïalade. Kane ka jingpeit bniah ïalade kan sdang naduh ka 12/Nailar/2026 bad kan kut ha ka 12/Risaw/2026 bad kane kan long ha baroh ki jylla.
Ka Dr. ka la ïathuh ba tang na u bnai Ïaïong, Jymmang bad Jylliew kiba ïoh ïa kane ka jingpang ki long 500 ngut, ki longkmie kiba armet ki la don haduh 60 ngut, la ong ba ynda la leh ïa kane ka jingwad bniah ki briew kin sa sngewthuh bad shisien ba ki dih ïa ki dawai ki lah ban im tymmen ruh haduh 80 snem kaba kongsan ka long ba hap ban dih tista man ka sngi ïa ki dawai namar ki dawai ki pyntlot bor ïa une u khniang jingpang la ïathuh ruh ba ka East Jaiñtia Hills ka dei ka District kaba bun eh kiba don ïa une u jingpang Niangkulia.