Plie u MP ïa ka Permanent Campus jong ka Khrawsing College ha Mawngap

Shillong, Naitung 25 : Ka jingduk kadei ka dawbah kaba khanglad ïa ki samla pule watla ki stad katno katno ruh hynrei kim ïoh lad ban bteng pat ïa ka jingpule sha Shillong, ong u MP ka Shillong, Bah Vincent H Pala haba kren ha ka jingplie ïa ka Permanent Campus jong ka Khrawsing Christian College kaba don ha Mawngap, Mawkharshïing.
U Bah Vincent u ong ruh ba ha ka shisnem da ki phew hajar ngut ki samla ki pyndep ïa ka Matrik bad ka Higher Secondary hynrei bun na ki watla ki stad hynrei ki kynduh jingeh ban ïoh rung klas ha Shillong namar ka jingduk.
“Kam dei eh ka jingstad ne ka jingeh ban ïoh admission hynrei kaba kongsan eh kadei teng teng ba ka lad kam plie haba ki kmie ki kpa ki dei kiba duk. Teng teng lada ngi stad ruh wat hadien ba ïoh admission ka eh ban ïoh leit. Hynrei haba don kum kine ki college (Khrawsing Christian College) ka ai jingkyrmen ïa kiba bun ki samla,” u la bynrap biang.
Da kaba ïaroh ïa ka Mawphlang Presbytery kaba la len lade ban seng ïa katei ka jaka pule, u MP u ong ruh ba dei da ka jingdon jong kum kine ki college jong ki Balang kiba long ka jubab ïa kiba bun ki samla kiba la duh ka jingkyrmen.
Shwa kane, u MP u la ong ruh ba ki bor pynïaid skul lada ki shaniah tang ha ka sorkar kin ym poi shaei shaei ruh hynrei ki dei ban da don ïa ka jingmih nalade ruh.
Ha kajuh ka por u la kyntu ruh ïa ki bor pynïaid jong katei ka College ba kin pynbiang ïa ki kot ki sla khnang ba un lah ban buddien bad ïoh ban mang jingïarap shuh ïa katei ka College nalor ka 25lak kaba u la ai mynshwa kum u MP. Na ka liang ka College ka la pynkup burom kyrpang ruh ïa ki saw ngut ki nonghikai kiba la ïai neh naduh kaba sdang ban shakri wat ha i jingsiew iba duna. La pynkup burom ruh ïa arngut ki samla pule, kata iwei iba ïoh heh mark ha ka Economics bad iwei pat iba khur takma na ka Meghalaya Games ha ka jingïalehkai ïa kura.
Ha kane ka sngi la ïoh ruh ïa ka jingkren na u MLA ka thaiñ Bah Eugene Lyngdoh, nangta na u MDC, Bah Lamphrang Blah, na u Secretary ka Education Department, Bah R Rapthap bad ruh ka history Lyngkot na u Rev. JR Thabah kumjuh na i Principal ka College, Dr. B Kharkongor.
La pynshongshit ïa ka jingplie ïa katei ka permanent campus da ka jingshad jingrwai na ki samla pule kumjuh ruh na ki nonghikai.