Kynnoh u Bah Prestone pyrshang leh politic u MDC ka BJP halor ka jingshah khynra ka Farm House
Shillong, Naitung 25: U Symbud Myntri Rangbah jong ka jylla ha ka sngi Nyngkong u la kyntait war ïa ka jingkam u Bernard N Marak ba ka don ka jinghukum na ka sorkar ban leit khynra ïa ka Farm House jong u bad u la kynnoh ruh ba u la pyrshang pynban ban pynlong Politic ïa kane.
Haba kren bad ki nongthoh khubor u Bah Prestone u la kyntait ruh ba ka don ka jngai hukum u Myntri Rangbah ne ka sorkar ban leit khynra ïa kane ka Farm House u MDC ka BJP.
“Mat dei mano mano ruh haba don ki kam be-aiñ ki pulit kin hap ban leh la ka kamram kat kum ki kyndon jong ka aiñ” ong u Bah Prestone.
Ha kaba ïadei bad ka jingkam u Bernard ba u Myntri Rangbah u la ai hukum ïa ki pulit ban siat ïap ïa u bad ban pynjah klep namar ka jingtrieng ïoh u Myntri Rangbah un shah rem ha ka ilekshon kaban wan u Bah Prestone u la ong ba kane ka jinhgkam u MDC ka dei ka jingkren khunlung khynnah suda.
“Lada u Bernard u sngew ba ka don ka jingshong syier ïa ka jingim jong u balei um ujor da ka FIR ban ïoh jingïada na ka sorkar bad balei u phet rieh pynban”, ong u Bah Prestone
U Bah Prestone u la ong ruh ba kane ka jingkhynra ka dei hadien ba ki pulit ki ïoh ka jingtip kaba thikna halor ka jinglong ktem awria.
“Peit tang ïa ki beer kiba la ïoh kurup da ki pulit ka kdew ba ka don ka kaei kaei ka kam sniew kaba la jia ha kane ka jaka” ong u Bah Prestone.
Haba kylli pat halor la ka sorkar kan thung kynhun tohkit ne em ïa kynhun tohkit laitluid u Bah Prestone u la ong “Lada ka kam ka dawa bad na ka liang jong ki kim hun ynda ki pulit ki la dep tohkit ka sorkar ka lah ruh ban thung da ka kynhun tohkit laitluid”
U Symbud Myntri Rangbah ka jylla u Bah Prestone Tynsong u la kam ba kan ym don satia ka jingktah ïa ka sorkar MDA wat hadien ba ka don ka jingkhynra ïa ka Farm House jong u Bernard
U Bah Prestone u la ong ruh ba kum kine ki jingkhynra ka ju jia ha kiwei ki jylla ruh haba don ki kam sniew kam be-aiñ kiba la leh da mano mano wat lada dei ki myntri ne ki dkhot ka sorkar.
“Haba kino kino ki kam sniew ki jia hato tang ba dei ki dkhot ka seng ba don ha ka jylla ngin shu sngap noh? Kampher phi dei bad ka sorkar ruh haba phi leh ïa ki kam sniew ki bor jong ka aiñ kin leh la ka kamram” ong u Bah Prestone