Kam long kaba bakla ban ong ba ki karkhana dewbilat ha Jaiñtia Hills ki pynïaid ïa ka sorkar jylla: KHNAM

Shillong, Nailar 10: Ka Khun Hynñiewtrep National Awakening Movement (KHNAM) ka la pynrem jur ïa ka jingïalang bishar paidbah kaba dangshen ba la pynlong da ka Meghalaya State Pollution Control Board (MSPCB) na ka bynta ban tih mawshun da ka Shree Cement, da kaba khot ïa kane kum kaba dei tang da kawei pat ka jingpynkynmaw ba ki cement plant ha Jaiñtia Hills ki dei kiba bthah ban shim ïa ki rai sha ka Board.
Ha ka jingkynthoh ba la phah da u working president u Bah Thomas Passah, ka KHNAM ka la kynnoh ba kane ka jingïalang bishar paidbah ka long kaba duna kumta kata ka public hearing bad kaba bun kum kata ka police hearing,” da kaba kam ba ki paidbah kiba kwah ban pyrshah ïa ka kam tih mawshun ki khlem da la ïoh lad ban shim bynta bad ban pynpaw ïa ka sur ki jingsngewkhia jong ki.
Ka party ka la pynpaw ïa kane ka juh ka jingïasynriem kaba kynthup ïa ka jingdonkti jong ka Star Cement ha ki por ba la leit, da kaba phai sha ka jingsaphriang ka video kaba la kynnoh kaba pyni ïa u trai jong ka plant u la bthah ïa ki pulit ka jylla ban bom ban tied ïa ki nongïakhih pyrshah.
Ka KHNAM ka ong ba ka East Jaiñtia Hills ka la dep shah ktah bha da ka jingdon jong kine ki cement plant ba doh haduh mynta, da kaba kynnoh ba ka la don ka jingpynjulor kaba jur bha ïa ki khlaw ki btap, ki um ki wah bad baroh ka sawdong sawkun.
“Ka la poi ba wat ka lyer ba ki paidbah ki ring mynsiem ka la long imat kaba la long bih, kaba lam sha ki jingpang kiba jur,” pule ka jingthoh ba la phah da ka Party.
Haba phai sha ka Environment Impact Assessment (EIA) Notification 2006 ba la phah da ka sorkar pdeng, ka KHNAM ka la ong ba ki cement plant kiba don bad ki projek ba pynheh ki donkam ïa ka public hearing kum shi bynta jong ka jingïasyllok ki paidbah ha shwa ban ïoh ïa ka environmental clearance.
Ka party ka la kynnoh ba ha Jaiñtia Hills, ïa kine ki kyndon ym shym la bat bha katkum ba la buh.
Ka KHNAM shuh shuh ka la kynnoh ba kine ki cement plant ki dei ki nongbei tyngka ïa ki political party ha ki por election. Da kaba kdew ïa ka nuksa, u Bah Passah u la ong, “Tang ka Star Cement ka la noh synniang haduh T. 50 lak,” bad namar kata, “Kam long kaba bakla ban ong ba kine ki cement plants ki pynïaid ïa ka sorkar bad ki ïoh ïa ki lynti jong ki ïa kaei kaei kaba ki kwah.”
Kumta na ka liang ka KHNAM ka la dawa ba dei ban don ka jingïasyllok kaba shit ba shai bad kaba ïaid katkum ki kyndon jong ka EIA bad ki sienjam kiba mardor ban kren halor ka sawdong sawkun bad ka koit ka khiah ha East Jaiñtia Hills.