Ka sorkar jylla ka ïai buddien ïa ka jingrung ka ktien Khasi ha ka Khyrnit ba Phra: SMR

Shillong, Naitung 25: U Symbud Myntri Rangbah ka jylla u Bah Prestone Tynsong ha ka sngi Nyngkong u la ïathuh ba ka sorkar jylla ka ïai buddien ban pynrung ïa ka ktien Khasi ha ka Khyrnit ba Phra jong ka riti Synshar. U Bah Prestone u la ïathuh ruh ba dei namar ka jingshim khia ka sorkar jylla ban sdang ïa ka jingithuh ïa ka Ktien Khasi bad Garo ka Kynhun Myntri ka la rai dang shen ba yn shah ïa ki dkhot ka Ïing Dorbar jylla ban kren ha ka Ktien Khasi bad Garo ha ka jingkren jong u ha ka jingpynkait paidbah ïa ka Kot “Ka Lapalang Ha Riwar” kaba la thoh da ka Dr Bashida Massar kaba dei ka Nonghikai jong ka St Anthony’s College, Shillong, ha ka 25 tarikm u Naitung 2022 ha St Anthony’s College, Shillong.
Haba kren kum u Kongsan u Bah Prestone u la ïathuh ba na ka liang jong ka sorkar ka la shim khia ban buddien bad ka sorkar pdeng ban pynrung ïa ka ktien Khasi ha ka khyrnit ba Phra jong ka Ri India. U Bah Prestone u la ïathuh ba dei namar ka jingpyrshahng dohïap ka sorkar jylla ban ïoh ïa ka jingithuh ïa ka ktien Khasi bad Garo ba ka Kynhun Myntri dang shen ka la mynjur ïa ka rai ban shah ïa ki dkhot jong ka ba kin kren da ka ktien Khasi bad Garo.
U Bah Prestone u la ong ruh ba ka sorkar ka leh katba lah ban tynruh bad kane da kaba lum thup ïa ki kot ki sla ban long ki sakhi kiba paka ba ka ktien khasi ka la dei ka por ban ïoh jingithuh na ka ri India.
Haba kren halor ka kam thoh u Bah Prestone u la ong ba ka jaidbynriew ka dangdonkam shibun ki nongthoh kiba kynsai kum ka Dr Basihida kiban tynrong ïa ka jingdonkam jong ka thoh ka pule namar kiba bun ki nongthoh ha kane ka juk ki shu pynmih ki kot kiba ym don dor satia.
“Don ki kot kiba ngi pule tang shi taiew ka pynngiah pynjlep ïa ki nongpule hynrei don pat ki kot kiba kat nang pule katta nangbang bad nangproh” ong u Bah Prestone.
Ka Proff. Badaplin War ka nonghikai jong ka Skulbah NEHU bad ka nonthoh ba paw jong ka jaidbynriew kaba la ïoh ruh ïa ka Khusnam Padmashree na u President ka ri ka la ai ka jingïaroh ïa ka jingtrei ba snah jong ka Dr Bashida Massar ha kaban lumthup ïa ki history jong ka shnong kaba la kha bad pynheh pynsan ryngkat ki jingpynshisha na ka jingstad jong ka kum kaba la pyntbit kyrpang ha ka laiñ Zoology.
Ka Proff Badaplin ka la ong ruh ba ki skor jingtip(Data) kiba ka Dr Bashida ka la tyrwa ha ka kot ki long kiei kiei kiba kynsai na bynta ki nongwad bniah ïa ka history jong kane ka shnong bad ki jingjia kiba jia ha ki sawkun jong ka kum ka jhinghap ka Liengsuin jong ka ri America ha ka thma bah ba ar ha jan ka shnong Lapalang.
Shuh shuh ka la ai ruh ka jingïaroh halor ka jingtih bniah ban ïoh ïa ki jingtip kiba deibiang(accurate) kum ka jingphah ïit bnïah ïa uwei u maw uba ka maw ba ka la lap na ka shnong ba dei pynban u synrong tah duriaw.
Ka Dr Bashida haba kren halor kane ka kot ka la ïathuh ba ka daw hi kaba pynlong ba kan thoh shaphang ka shnong Lapalang kawei na ki shnong ha rum Pynursla ha Riwr Mihngi ka dei ban pynneh pynsah ha ki kot ïa kiei kiei kiba ka pateng mynta ka la sdang klet bad ïa ki jhur ki jhep, ki soh ki pai, ki jingïalehkai kiba la duh jait ha kane ka shnong.
Ka Dr Bashida ka la kyrpad ruh ïa ka sorkar jylla ba kan ïarap bai shon ïa ka kot namar kiba bun ki nongthoh ki shem jingeh wat tang ban ïoh ïa ka bai phah shon.
Ha kane ka sngi la sakhi ïa ka jingpynlait ïa ka kot da u Dr Brother Albert L Dkhar Principal ka St Anthony’s College, Ka Kong W.A.M Booth, Director of Arts and Culture, U Most. Rev Victor Lyndoh DD Archbishop ka Shillong bad kiwei de ki nongshah khot sngewbha bad la ïoh ruh ïa ka jingrwai ba syiang na ki Aroha Choir bad na ki khun ka Dr Bashida.