Khliehriat nailar 10: U District Magistrate ka East Jaiñtia Hills District,u Manish Kumar,IAS mynta ka sngi u la pynbna paidbah ïa ka jingpyntreikam da ki kyndon aiñ jong ka 223 Bharatiya Nyaya Sanhita (BNS) ha shi lynter ka surok bah National Highway ha East Jaiñtia Hills District kata naduh Tuber ter tershaduh Malidor ha kaba la mana ïa ki kali heh bad kumjuh ruh ki kali rit ban ieng ne park ha surok National highway bad ban buh kino kino ki jingshna hajan surok.
Ka jingpynjari ïa ki kyndon 223 of the Bharatiya Nyaya Sanhita (BNS) ka long ban iada ïa ki paidbah ba leit ba wan ban lait na kano kano ka jingiatyngkhuh kali, ban lait na kano kano ka jingduh ka jingim briew bad jingduh ki tiar ki tar, namar kane ka surok National highway na East Jaiñtia Hills District ka dei ka surok kaba bun bha ki kali kiba iaid na kane ka surok kiba kit ïa ki tiar ki tar bad ba kit ïa ki briew bad leit jingleit.
Na ka liang ki bor district ki la ju lap bad iohi ba ki kali heh kum ki trok ki ju pynieng pathar ha surok national highway kiba ju long ka jingwit bad pynthut ïa kiwei pat ki kali kiba iaid na kata ka daw khnang ban lait na kano kano ka jingma jingmynsaw bad ban wanrah ïa ka jingshngaiñ ha ka leit ka wan jong ki paidbah u District Magistrate u la pynbna da ki kyndon jong ka 223 jong ka Bharatiya Nyaya Sanhita (BNS).
Lada lap ïano ïano ba pynkheiñ ïa ka hukum yn pynshitom katkum ki kyndon lane section 223 jong ka Bharatiya Nyaya Sanhita (BNS) bad kiwei kiwei ki kyndon jong ka aiñ kiba ïadei bad ka jingpynkheiñ aiñ.
La ong ba kane ka hukum ka la treikam mardor tat haduh ban da pynbna da kumwei pat.
