Shillong, Nailar 10 : U Auxiliary Bishop jong ka Shillong Archdiocese, u Bishop Bernard Laloo, u la pynskhem bad pynbam smai ïa ki 19 ngut ki nongkitkam bathymmai jong ka Seng Samla Catholic Malki, ha ka Mass Bakhuid kaba la pynlong ha iingmane jong ka Balang shnong Malki.
Ha ka jinglehniam kaba la bynta da u Bishop Bernard Laloo, la wan ban don lang u Fr. Rister Marbaniang ha ryngkat ka jingshim bynta shitrhem da ki paid riewngeit, ki samla, ki heprit, ki nongkikam jong ka Seng Samla Cathredral Parish, ki dkhot ka SACYM, ki riewniam bad ki khynnah convent jong ka Little Flower School.
Shuwa ban pynskhem ïa kine ki nongkitkam bathymmai jong ka Seng Samla Catholic Malki, u Bishop Bernard Laloo, u la sneng la kyntu bad ban ai mynsiem ïa kine ki samla ka balang jong ka shnong Malki.
U la ong ba sngewkmen ba ki samla ki la long kiba kloi ban wan shakhmat khlem rieh, bad ki la shim ïa kane ka bynta na ka bynta ka jingshakri ïa u Blei.
Ha ka por janmiet, u Fr. Evansius Rymbai, u la pynlong ïa ka Jingmane Sacrament kaba la bud hadien ka jinglehkmen kaba la pynlong da ka United For Christ ha ka por mynsngi bad la ïoh ruh ban ot ïa u cake kum ka dak ka jingkmen hadien ba la ïoh ïa ki nongkitkam bathymmai.
Ki nongkitkam bathymmai jong ka SSCM, ki long u samla Kitbok Kharmalki kum u President, Regina Kharmujai kum i General Secretary, Rubina Khonglah kum i Pastoral Secretary, Frankie Kharmalki kum Finance Secretary, Kevinus Barim kum u Social Secretary, Melverine Kharsynteng kum Music Secretary, Dafflyne Kharbyngar kum Education Secretary, Freddy L. Kharnaior kum u Sports Secretary bad Marvin Warlarpih kum u Publicity Secretary.
Nalor kine la jied ruh ïa i Achin Kharmudai kum u vice president, Ïaiteilang Kharmalki kum u Asst. general secretary, Albinus Nongspung bad Maramot Khongtim kum ki Asst. Pastoral Secretary, Kenny P. Kharnaior u Asst. Finance Secretary, Medari Rapthap kum I Asst. Social Secretary, Daiakmenlang Rapthap kum I Asst. Music Secretary, Rudolf Lyngdoh kum I Asst. Education Secretary, Neil Kharmalki kum u Asst. Sports Secretary bad Freddy Nongspung kum u Asst. publicity secretary.
