Shillong, Nailar 10: Ka Dakahi Kyndait jong ka jylla Meghalaya ka la pyndep ha ka kyrdan ba nyngkong napdeng ki kynthei ha ka World Championship 2026 Ladakh Trail to Heaven 100km.
Kane ka dei ka jingïakop kaba jur bha, kaba la pynlong ha ki lai tylli ki kyrdan jingjngai – 35km, 100km bad 100 miles (158km). Ka jingïakop kaba 100 kilo mitar jong ka Dakahi ka dawa ruh ïa ki nongïashim bynta ban mad ïa ki jingtynjuh kiba jur ynda la poi sha ki bynta ba kham kynjang ha ka jingjrong kaba jan 4000m naduh kaba sdang haduh kaba kut.
Ki nongïashim bynta ki hap ban poi kham kloi ym duna ïa ka shi taïew ban pynïadei ïalade bad ka jinglong jingman jong ka sawdong sawkun jong ka mariang ha katei ka thaiñ shuwa ba kin jam shakhmat ha kane ka jingïakop.
Ka Dakahi ka la ïohpdiang ïa ka khusnam pisa kaba $500 (Rs 47,645 ha ka pisa India).
Da kane ka jingjop ka la ïoh ka jingïaroh na u Myntri Rangbah ka jylla Meghalaya, u Conrad Sangma, uba la ai khublei halor kane ka jingjop ha ki rynsan social media.
“Ka jingkhublei kaba khraw ïa ka Dakahi Kyndait kaba la pyndep ha ka kyrdan ba nyngkong ha ka World Championship 100K Ladakh Trail to Heaven 2026 ha ka liang jong ki kynthei. Ka Dakahi kadei ka nongïalehkai marathon ba la tbit bha bad ha kine ki snem ka la kiew sha ki kyrdan kiba shalor bad ka la jop ha kiba bun ki jingïakop. (Nga) Sngewkmen ban kyrshan ïa ka jingïaid lynti jong ka. Ngi kitbok kitrwiang ïa ka ban bteng ïa ka jingjop.” la thoh u Conrad.
Ha kajuh ka por na ka liang ka Meghalaya Police ka la ai ka jingïaroh ïa kane ka samla kaba dei na katei ka tnad halor ka jinglah jong ka ban wanrah ïa ka burom kaba khraw ym tang ïa ka tnad hynrei ïa ka Jylla baroh kawei.
