Ka shongkha khynnah kawei na ki daw ka jingkhyllem noh bad ka jingbym poi sha ka Thong : Lambok Marngar

Shillong, Naitung : Ka Khasi Students Union (KSU) Nongtyngur Unit ka ba hap hapoh ka KSU South Central East Circle, Pynursla ha ka 23 tarik mynta u bnai ka la ïoh ban pynlong ïa ka jingsam khusnam “1st Maitshaphrang Academic Award 2021-22” sha ki samla pule ka thaiñ kiba la lah ban leh bha ha ki eksam bapher bapher, ba kynthup naduh ka SSLC, HSSLC bad haduh kiba la pyndep ia ki jingpule Degree & Master Degree bapher bapher.
Ka Seng ha katei ka sngi ka la ai sngewbha da ka khusnam jingithuh kyrpang sha ki nongtrei mon sngewbha kiba kynthup ïa ki nongïarap ban maramot ïa ki jingkieng jri kiba ka seng ka lah shimti ban sumar sukher, ïa ki Rangbah Shnong bad ki Sordar Raid kiba don hapoh ka dong ka thaiñ kum ka dak ka jingithuh kyrpang bad ka jingai mynsiem na bynta ki kam shakri paidbah ba ki la lah ban synñiang ïa ka imlang sahlang bad Ri ka jaidbynriew.
Ha katei ka sngi la ïa don lang u Samla Lambokstarwell Marngar President ba Rangbah duh ka KSU kum u Kongsan, uba ha ka jingkren ha kane ka sngi, u la ong “ki samla ki dei ban rai nangne shakhmat ban ym ai wai shuh ïa ka jylla sha ki briew ki ba na shabar ka Bri u Hynñiewtrep. Haduh mynta mynne, ngi dang ai wai sah ïa ka synshar khadar kum ha ka kyrdan ki IAS, IPS bad IAS sha ki briew kiba nabar ka jylla bad lada ngi dang ai wai sah ïa kiei kiei sha ki briew kiba na bar ka jylla, kane kan buh ha ka jingeh ka kaba khraw ïa ka Ri bad ka Jaidbynriew ha ki sngi ban dang wan.
U la pynkynmaw ruh ba ki samla Khasi kim dei satia kiba duna ka jabieng bad ki jingmut jingpyrkhat ban kynjoh lem sha ka thong kumba long kiwei kiwei pat ki Jaidbynriew, hynrei ngi don ïa ki samla ki ba tbit, kiba shemphang bad ki ba ïa ryngkat kyrdan bad kiwei pat ki Jaidbynriew, hynrei ngi duna ka mynsiem ïakhun dohïap bad ruh ki don ki samla ki stad bha hynrei ka lad kam plie, dei na kane ka daw ka KSU ka la shim ïa ki sienjam ban jied ïa ki samla pule ka jaitbynriew kiba tbit ban phah shabar ka jylla ban leit pyntbit ha kaba ïa dei bad ka civil service examination bapher bapher khnang ba ki samla ka jaidbynriew kin bat hi ïa u shabuk ha ka synshar khadar hapoh kane ka Ri jong ngi.
Shuwa ban pynkut ha ka jingkren na ka liang u President ka KSU u la pynpaw ka jingsngew bynñiaw namar jingshongkha khynnah ha ka Jaidbynriew ka dei kawei na ki daw ka jingkhyllem noh khlem poi sha ka thong namar ki samla jong ngi ha ka jaka ban pyndep ïa ki jingpule hynrei kiba bun ki pass pynban da kiwei pat ka degree kata ban ïoh khun ïoh kti bad kane ruh ka dei ka jinghiar ka jaidbynriew.
Ha kane ka sngi la ïoh ruh ka jingkren lyngkot na u Samla Osternic Marbañiang, Organising Secretary ka KSU Sengkmie u ba la long ruh u Kongsan ba kyrpang ha kane ka sngi u la ong ba ka kane ka thaiñ ka dei ka jaka kaba kamai bha na ki kam jngohkai pyrthei, hynrei kum ki samla ki bad ki nongshong shnong jong kane ka dong ka thaiñ ki dei ban long kiba peitngor bad kiba husiar ïa ka jingwan tuid ki briew ki ba na bar kumba ngi sakhi ba dang shen ïa kaei kaba la jia ha Sohra ka jaka kaba kiew bha ha ki kam jngoh kai pyrthei ba ki briew kiba nabar jylla ki la pyrshang ban rahbor ïa uwei u samla nongshong shnong katei ka thaiñ.
Ha kane ka prokram la ïoh ruh ka jingkren na u Symbud Kongsan, u Bah Ryngkatlang Lyndem MDC Lyngkyrdem-Laitkroh Constituency uba dei ruh uwei na ki dkhot barim ka KSU Laitlyngkot Unit u ba la pynpaw ba ka jingduk kam dei satia ban long ka daw ka jingrandien noh ki samla ha ka pule puthi bad ban trei ïa kino kino ki kam kiba myntoi ïa ka imlang sahlang.
U la ong ba u ngeit skhem ba lyngba ka jingïoh pdiang ki samla ïa kine ki khusnam bala pynkhreh da ka Seng KSU, kan long ka jingai mynsiem ïa ki samla ban jam shaprang bad ban ïai iakhun ban poi sha ka thong khnang ba kin lah ban ai ïa ka jingshakri ïa la ka shnong ka thaw, ka dong ka thaiñ bad ïa ka Jaidbynrew hi baroh kawei.
Kiwei pat ki ba la aijingkren ki kynthup ïa u samla Melajied Khonbuh, General Secretary KSU Nongtyngur Unit, Bah Iaraplang Tangsong, Rangbah Shnong ka Shnong Nongtyngur, Babu Manuel Khonglamet, CRC Coordinator SSA Nong tyngur bad kiwei kwiei.