Nongpoh, Nailar 09: Katkum ka hukum jong ka Supreme Court bad ka jingthmu jong ka tnad Food & Public Distribution, jong ka Sorkar India, ban pynthikna ba baroh ki nongioh jingïarap hapoh ka National Food Security Act (NFSA) kin pyndep pura ïa ka e-KYC, kumjuh ruh ban weng ïa ki card rashon kiba ym dei hok bad ki silent ration card, u Deputy Commissioner (Supply) u la bthah ïa baroh ki nongioh rashon ban pyndep ïa ka jingpynshisha e-KYC shwa ka 31 tarik Nailar, 2026.
Katkum ka jingbthah, baroh ki nongioh rashon hapoh ka kyrdan AAY bad PHH ki hap ban pyndep ïa ka e-KYC ha ka por ba la buh bad ki bym pyndep hapoh katei ka tarik, yn kheiñ ïa ka card rashon kum ka silent ration card bad ka lah ban shah weng noh na ka thup jong ki nongioh rashon.
Naduh mynta ka jingsam ïa u khaw rashon kan long katkum ka jingpyndep e-KYC. La pyntip ruh ba ki nongbat ïaka card rashon AAY, ka jingioh khaw kan long katkum ka jingdon jong ki dkhot kiba la pyndep e-KYC. Hynrei lada baroh ki dkhot ha ka ïing ki la pyndep ïa ka e-KYC, kin ïoh ïa ka bhah pura kaba 35 kilo kawei ka card. Haba ïadei bad ki PHH, ka jingsam ruh kan long katkum ka jingpyndep e-KYC.
Shuh shuh, la bthah ïa baroh ki Fair Price Shop (FPS) Dealer ba kin peitngor bad kim dei ban sam sha kito ki nongbat ïaki card rashon kiba dei ki nongtrei sorkar, ki nonghikai sorkar kynthup ïa ki nonghikai Deficit, Adhoc, SSA bad RMSA bad lada don ki dei ban pyntip mardor sha ka ophis u Deputy Commissioner (Supply) bad ban pynphai noh ïa kitei ki card rashon.
La bthah ruh ïa ki FPS Dealer ba kin pyndonkam beit ïa ka e-POS machine ha ka por ba sam khaw bad ban buh ryntih ïa ki Sale Register bad Stock Register na ka bynta ka jingkhuid jingsuba ha ka rukom sam. Lada lap ba kim bud ïa kine ki kyndon, yn shim da ki sienjam kiba tyngeh pyrshah ïa ki.
Nalor kata, yn sa pynlong ruh ïa ka jingjurip kaba bñiah ïa baroh ki card rashon ha ki Fair Price Shop Centres, bad la kyrpad ïa ki Rangbah Shnong bad ki Village Vigilance Committees ba kin ai ka jingïatreilang ban pynurlong ïa kane ka kam.
Ka tnad ka la pynkynmaw ruh ba katkum ka Meghalaya Foodgrains and SK Oil (Public Distribution System) Control Order, 2022, bad ki kyndon jong ka National Food Security Act (NFSA), baroh ki Fair Price Shop Dealer ki hap ban bud ryntih ïa baroh ki jingbthah ba la pynmih da ka bor ba dei peit, kynthup ïa ka jingpynshisha ïa u Aadhaar, e-KYC, e-POS Transaction, bad pyndonkam ruh da ki Electronic Weighing Scale, bad ka jingbuh jingthoh kaba biang ha ki Sale bad Stock Register, khnang ban pynthikna ïa ka jingsam hok, kaba shai bad kaba khuid ïa ki marbam sha ki paidbah ba dei hok.
