SHILLONG, Nailar 09: Ha ka Joint Patrol ba nyngkong jong ki lai kynhun ba la pynlong ha SE Falls ha ka miet 8 tarik u Nailar da ka kynhun 26 jong ka 101 Area Provost Unit, ki pulit jong ka Jylla Meghalaya, bad ki 67 Bn CRPF, la kem ïa uwei u trai shnong uba la die ïa ka kyiad lieh ba khlem laisen ha madan Urkaliar.
Kumba 100 litar la ioh kurup bad la pynjot ha katei ka jaka da ki pulit.Katto katne ngut ki nongleh kam sniew la pynher krad na katei ka jaka, kaba la pynbha ïa ka jingshngain jong ki riew paidbah bad ki shipai ïada ri ha SE Falls.
Kane ka jingïatreilang kaba nyngkong eh jong ki lai tylli ki kynhun ka pynpaw ïa ka jingïatreilang kaba khlaiñ hapdeng ki Army, ki pulit jong ka jylla Meghalaya, bad ki CRPF ha kaba kila lah ban pynneh pynsah ïa ka jingïada ha nongbah Shillong.
