Nongstoiñ, Nailar 05 : Ha kane ka sngi balang ka 5 tarik Nailar ki nongïalam ka Synjuk Nongstnshar Shnong Hima Nongmnsaw Syiemship kaba hap ha ka Langpih sector ki la leit ban ïakynduh ï ka Smt Hmea Nayak IAS Deputy Commssioner West Khasi hills na kabynta ban pynsgew ha ka ïa ki katto katne ki mat ba don kam ha kaba ïadei bad ka jingthmu jong ka sorkar ban sdang biang ïa ka jingïakren ha kaba ïadei bad ka jingpynbeit ïa u pud u sam jong ka Langpih sector.
Ki nongïalam ka Synjuk haba ïakren bad ki lad pathaikhubor hadien ba ki la mih na ka kamra trei kam jong ka Deputy Commssioner ki la ong ba ka jingwan ïakynduh jong ki ka long hadien ba ki la ïoh jingtip ba ka sorkar ka la thung biang da kawei pat ka Regional Committee on Border Dispute na ka bynta ka West Khasi hills bad katei ka Committee ka dei ban peit ha kaba ïadei bad ka jing leit jurip ïa ki shnong ki thaw bad ki jaka ki puta kumba la leh ha ka por ba ki p[ynbeit ha ka wat kaba nyngkong. Nalor kata ki la ong ruh ban a ka liang ka synjuk ka la aiti ruh da ka jingthoh ha kaba la kdew ba ynda ka sorkar ka la khot ïa ka jingïalang na ka bynta ban ïakren halor ka jingpynbeit pud ka dei ban kynthup lang ruh ïa ki nongsynshar shnong kiba dei na ki jaka khappud namar ki khamtip bniah ha kaba ïadei bad ki jaka ki puta . Hakajuh ka por ki la ong ba ha ka jingïalang dei ban kynthup ruh ïa ki nongïalam jong ki sengbhlang khnang ba kan ym don kano kano ka jingbym hun jong ki nongshong shnong.
Ha kaba ïadei bad ki jaka ki puta bad ki shnong ki thaw kitei ki nongïalam ka Synjuk ki la ong ba ynda ka por ka la dei ba kin leit ban jurip ka Regional Committee kaba thymmai ka dei ban bud beit thik ï kaei kaba ka Regional Committee kaba rim ka la dep leh mynshuwa namar kat kum ka jingtip jong ka Synjuk ka jingpruid dak jongka Regional Committee kaba rim ka dei kaba biang bad kaba pynhun ruh ïa baroh ki nongshong shnong ha khappud.
Shuh shuh ki la ong ba kumba ka long haduh mynta ki paitbah jong kawei pa kawei ka shnong ha khappud ki kwah beit ban don ha Meghalaya kumta lada ka por ka la poi ban pynbeit ïa u pud u sam ki ar sorkar kim dei ban pynbor ïa ki nongshong shnong ba kin wan sha Meghlaaya ne kin leit sha Assam hynrei ki dei ban ai ka mon laitluid ba kin leh kat kum ka jingkwah jong ki. Khatduh eh ki la ong ba ha katei ka jingleit ïakynduh ki la kyrpad ruh ïa ka Deputy Commssioner ba kan ïakren bad ka sorkar Assam ba kam dei ban pynthut bad khanglad ïa ki kam pynroi ba ka sorkar Meghlaya ka ai sha ki shnong ki thaw ha khappud namar dang ha u bnai ba la dep ka la don ka jing pynthut jong ki pulit Assam ïa ka jingtei ïa ka Sub Health centre ha Kamphaduli bad ka jingpyntrei ïa ka surok na langpih sha Mawdiangsnam kaba hap kam lyngba ka surok ba la shna da ka sorkar Assam. Ki la ong ruh ba halor kitei ki jingkyrpad jong ki ka Deputy Commssioner ka la kular ba kan shim khia ban ïakren bad ka sorkar Assam na ka bynta ka jingmyntoi lang jong ki patbah ka thaiñ.
