Ngim kyntait ba ka Byrnihat ka jaboh, hynrei kam dei shuh kaba jaboh tam: Sosthenes Sohtun

Shillong, Nailar 05 : U Myntri Sorkar ka Jylla ba dei ruh u MLA ka Jirang Constituency, Bah Sosthenes Sohtun, u la ong ba kim lem ba ka Byrnihat ka dang don ka jingjaboh ha ka lyer, hynrei kam dei shuh ka jaka kaba jaboh tam ha pyrthei.
Haba kren sha ki lad pathai khubor, u Bah Sosthenes u la ong ba ka Byrnihat ka don bun tylli ki karkhana, kumta ka jingjaboh lyer ka dang don. Hynrei, kam long kaba dei ban ong ba ka Byrnihat ka dei ka jaka kaba jaboh tam ha pyrthei.
U la ong ruh ba ki karkhana ki dei ban bud ïa ki kyndon jong ka Meghalaya State Pollution Control Board (MSPCB), khnang ban tehlakam ïa ka jingjaboh.
“Kumba ka long mynta kam dei kumta, hynrei haba ïadei bad ka jingjaboh ka lyer te ngim lah ban shu pynksan ba ka khuid namar phi lah tip ba ka Byrnihat kadei ka jaka ba don bun tylli ki karkhana kumta ka jingpynjakhlia ne ka jingbym bud ki karkhana ïa ki kyndon ba ka Meghalaya State Pollution Board (MSPCB) ka la bthah, te kan don beit hi ka jingjakhlia hynrei ban ong ba ka dei kaba jakhlia tam ha pyrthei te kam dei kumta,” la ong u Bah Sosthenes.
U la pyntip ba ka Sorkar, lyngba ka MSPCB, ka la ai ïa ki kor kiba lah ban pynhiar ïa ki tdem jaboh kiba mih na ki kali bad ki karkhana. Katkum ka report, kine ki kor ki lah ban pynhiar ïa ki tdem jaboh da kumba 40 haduh 50 percent.
U Bah Sosthenes u la ban jur ba watla ka Sorkar ka dang pyrshang ban tehlakam ïa ka jingjaboh, ki karkhana ki hap ban bud ryntih ïa ki kyndon jong ka MSPCB. Kino kino ki karkhana kiba pynkheiñ ïa ki kyndon kin hap ban shah pynshitom katkum ka ain.
“Hynrei dei ban sngewthuh ruh ba watla ngin pyrshang ïa kane ka Project hynrei ki karkhana kiba don hapoh Byrnihat kim dei ban ïaid lait ïa ki kyndon ba la buh da ka MSPCB bad kino kino kiba ïaid lait ne pynkhein ïa ki kyndon kin shah pyngat katkum ki kyndon ain” u la bynrap shuh shuh.