Da ki hajar ton pynmih ka shnong Mynriang ïa u soh Water Melon hynrei jynjar ban pynïaid ïew

Shillong, Nailar 5: Ka shnong Mynriang kaba kadei kawei na ki shnong kaba hap hapoh u pud u sam jong ka East Khasi Hills District, hynrei hato ki paidbah ba bun ki tip ne em shaphang jong kane ka shnong kaba la kylla paw nam bha tang da kaba rep ïa u wei u jaitsoh.
Kane ka shnong Mynriang kaba jngai tang 44 kilometer na sor Shillong bad ka jingpaw nam jong kane ka shning kadei tang na u wei u jait soh ba baroh shi shnong kila kylla long kinongrep ïa u soh water melon bad tang ha ka shi aiom kila lah ban pynmih da ki hajar metric ton kata tang hapdeng u bnai Iaiong haduh u bnai Nailar.
Ka shnong Mynriang kadei ka shnong ba khatduh jong ka East Khasi Hills ha shwa ban poi noh sha ka shnong Thadrang jong ka Ri Bhoi District ha ka thain Mawlasnai.
Ha ka jingïakynduh bad u nongthoh khubor jong u Mawphor ryngkat bad ki nongialam shnong la ioh jingtip ba ki paidbah jong ka shnong kila sdang ban kiew ha ka ioh ka kot tang lyngba jong une u soh.
Na ka liang u Bah JJ Lyngkhoi uba dei u Secretary ka shnong Mynriang u la ong,
“Ïa ka kam rep soh water melon hapoh ka shnong Mynriang la sdang nyngkong da uwei u riew rangbah jong ka shnong uba shu thung myllen ïa lade ha u snem 2020, hynrei haba u la soh u long shisha uba ïarap ïa ka ioh ka kot jong ka ïing ka sem”.
Ki paidbah nong shong shnong hadien ba kila iohi ïa ka jingmyntoi ba ioh na une u soh, ha u snem 2024 baroh ki long ïing hapoh ka shnong Mynriang kila sdang ban rep paidbah ïa une u soh hapoh ki lyngba rep jong ki, ong u Bah Lyngkhoi.
Shuh shuh u la pyntip ba ki don ki ïing kiba la thung bun ka kamai kaba ki ioh ruh ka lah tam ïa ka lai ne saw lak tang ha ka shi aiom.U la pyntip ba ki paidbah ki sdang ban thung ha u bnai Iaiong bad tang ha u bnai Jylliew kila sdang ban ioh kheit bad kim ju pyndonkam dawai lait tang ka sboh eit masi.
U Bah Lyngkhoi u la pyntip ba u soh ba mih na kane ka shnong udei shisha uba bang bad ba thiang bha bad ka jingbun um ruh ka jur bha.
Ha kaba iadei bad ka iew ka hat, u Bah Lyngkhoi u la ïathuh ba ki paidbah ba bun ki shu leit ban tyrwa sha ki shnong ki thaw ha ka dor T. 30 shi kilo bad lada ki don kiba leit die sha sor Shillong ka dor ka poi T. 60 shi kilo.
Shuh shuh u Bah Lyngkhoi u la iathuh ba ka por ba khatduh ïa une u soh kan dei hapoh jong une u bnai Nailar.U la pyntip ruh ba ka shem jingeh ïa ki nongrep namar bay m don ki jaka ban buh kyrpang ïa une u soh ne ka Cold Storage khang ba ki nongrep kin ym duh ei ïa u Soh.
Hapdeng kane ka jingkyrkhu ki paidbah nong shong shnong ki kynduh pat ïa ka jingeh ba khraw kumno ban pynïaid iew ïa u soh, namar ba lada don ki nongkhaïi ne ki heh spah kiba shalan shabar ka jylla kin wan ban thied ïa u soh jingki kan long shisha ka jingmyntoi ïa ki nongrep hapoh jong ka shnong.
Kyntang ïawai, ki nongïalam shnong kum shi bynta ban pynpaw pyrthei ne ban pyntip paidbah ïa ka shnong ka thaw da kawei ka sur kila rai ban pynlong da ka Water Melon Festival ha ka 15 tarik mynta u bnai Nailar kum shi bynta ban khring ïa ki paidbah bad ki nongkhaïi.
Halor kane ka tamasa na ka liang u Bah Lyngkhoi u la khot sngewbha ïa baroh ki shnong kiba marjan kiba hap hapoh ka Mawryngkneng Block bad kumjuh ruh ïa ki tnad sorkar bapher bapher ba kin ïa wan lang ha katei ka sngi ban sakhi bad u la bynrap ruh ba lehse phi lah ban ioh bam ïa une u soh hynrei phim tip pat ka tynrai ba u mih.