Nongstoiñ, Nailar 05: Kiba bun ki riew rangbah bad longkmie ka thaiñ Mawshynrut, ki la pynkynmaw biang na u MLA jong ka thaiñ kata u Bah Methodius Dkhar, ban pynurlong noh ïa ka Mawshynrut Civil Sub Division ba pura, kumba la ju angnud bad ap khmih lynti da ki paidbah nongshong shnong baroh shikatta.
Ki paidbah ki la pynpaw ba ka mat ba hakhmat ka dei khamtam ka roi ka par bad ka kyrdan longrynieng jong ka thaiñ Mawshynrut, kaba watla ka la ïoh ïa ka Civil Sub Division la katto katne snem mynta, pynban la donkam ban pynbha pynjanai shuh shuh bad kiba bun ki kam ki jam khamtam ki tnad sorkar ki ban pyntyllun na ka bynta ka roi ka par ki dang ïaineh sah kumjuh.
Na ka liang kiba bun ki longkmie bad riew rangbah ki la pynpaw ba watla ha kine ki snem ba la leit ki la kyntur sha u MLA barim u ba long ruh ha kajuh ka por u MDC, ba um shimkhia ban pynkylla dur noh. Hynrei, imat um shym la lah satia ban leh kumta watla u don ha ka sorkar baroh san snem lynter.
Kumta ki la ong ba mynta ki khmih lynti bad ki da kyrmen skhem ruh ba u MLA ba don burom Bah Methodios Dkhar un pyni ba ki kam ki kren kham jam shisha. Hooid ki la don bun bah ki kam kiba la paw kum ka Kolej sorkar, ka jinglah ban nang pynbha shuh shuh ïa ki jaka sumar kum ki Sub Centre sha ki PHC kaba la long ha bun ki jaka jong ka Constituency.
Nalor nangta dang bun bah kiwei kiwei kiba ym shym la paw pyrthei, hynrei ki paidbah nongshong shnong ki kyrmen skhem ba une u nongmihkhmat un nang trei shitom kumba u la pyni da ki kam mar naduh ki sngi ba u dang shu jop elekshon.
Ki la don katto katne ki riew rangbah ki bym da kwah than ban pynpaw kyrteng, ki la ong ba la donkam kyrkieh ruh ban pynkiew noh ïa ki jingthiah ki nongpang ha Riangdo CHC. Nangta ban wanrah bad thung noh ïa u SDMO, nangta ban wanrah noh ïa ki Specialist ban sumar ïa ki khunlung bad longkmie (pediatric & gynecologist).
La donkam wanrah noh ïa ki tiar sumar nongpang kum ki X-Ray bad Ultrasound Machine, ban pynkiew ïa ki jingdon jong ki Nurse bad ki nongtrei ha ka jaka sumar, khnang ban lah ban ai ka jingshakri ka janai sha ki paidbah. Namar ka Mawshynrut Civil Sub Division ka la long ka jaka ba kham ïar bad ka nang bun bad nang kiew ka jingbun ki paid nongshong shnong.
Nalor kine ki mat ba kham kongsan, ki la pynpaw ruh ïa kiwei kiwei ki mat kiba ïa dei bad ka bha ka miat bad ka roi ka par jong ki paidbah nongshong shnong ka thaiñ, kiba yn ym lah ban jer lut hangne. Hynrei, ki don ka jingkyrmen kaba skhem ba u Bah Methodius Dkhar, kum u nongmihkhmat sha ïing dorbar thaw aiñ ha ka liang synshar, u don ha ka bor bad lah ban leh shibun kiei kiei na ka bynta ki paidbah ka thaiñ.
