Nongstoiñ, Naitung 04: Naduh u snem 2007, watla ki la don ki briew kiba wan sorbe surok shisien man la ka san snem ynda la jan dei ka por Election MLA bad MDC, hynrei haduh mynta ym shym pat la paw dak eiei ba ka sorkar kan mynjur ban mang pisa ban tih surok noh na Nonglang sha Rambrai.
Ki riew rangbah jong ka thaiñ Rambrai West Khasi Hills kum u Bah S.Lyngdoh bad R.P Lyngdoh Nonglyngkien, hadien ka jingïohi man ka por halor ka jingleh sorbe da ki briew ka tnad PWD, ki la wad jingtip lyngba ka hok wad jingtip na u Executive Engineer ka PWD Nongstoiñ Division halor ki saw tylli ki mat, ha kaba la paw ba ka jingwan sorbe surok ha ka thaiñ Rambrai naduh 2007 haduh 2024 ka long kaba shu thok.
Haba kylli na ka ophis ka don ne em ïa ka jingkheiñ kaba thikna ba ka surok kaba ki sorbe ka don katno kilomitar ka jingjngai bad la mang pisa katno ban pyntrei ïa ka surok. Hato ka sorkar ka don jingmut ne em ban pyntrrei noh ïa katei ka surok kaba la ju wan thew man ka por shuwa ban wan ka Election MLA bad MDC bad lano kan sdang ban pyntrei noh. Ka jubab ka long beit “Em ka ka ophis kam don jingtip”.
Ka jingwad jingtip jong kitei ki rangbah lyngba ka hok wad jingtip, ka dei namar ba ka surok kaba kitei ki briew ki ju wan ban sorbe shisien man la ka san snem ka dei kaba ïaid lyngba ki khyndai tylli ki shnong ka Mawdet, Mainop, Mawïong, Mawkhiat mihngi, Mawkhiat sepngi, Domkyrkoh, Um-A, Rynñiaw haduh Umshem kiba dei ki shnong ki bym pat don surok satia.
Kitei ki rangbah ki la pan jingshai ruh na u Executive Engineer ka PWD, la ka la don ne em ka jingai jingmut bad ka jingïakut ban shna ïa ka surok na ka shnong Nonglang kaba hap ha ka Rimuliang C&RD Block, ban pyndei halor ka surok na shnong Nonglang sha Rambrai kaba hap ha ka Rambrai C&RD Block kaba hap ha kajuh ka constituency bad lada ka don katno kilomitar ka jingjngai ka don?.
Ka jubab kaba ki la ïoh na u PIO ka long “Ka proposal lane ka jingthmu ban pyntrei ïa katei ka surok kaba la pruid dak da ka sorkar ka long ‘Construction including metaling and black topping of Nonglang to Rambrai Road via Kyrdum including Bridges (L=26.00 km) bad ka estimate katkum ka jingkheiñ jingdiah kaba bniah da ka ophis jong ka PWD ka long 112.75 {shispah khat ar klur hynñiew phew san lakh tyngka) bad ïa baroh ki concept paper la dep submit sha I Secretary ka PWD (R &B) Meghalaya Shillong ha u snem 2023-24.
Ha kajuh ka por u PIO u la ai jubab ruh ba ïa ka phase I jong katei ka surok kaba don 10 kilomitar la dep submit ruh ïa ka Detail Project Report (DPR) kham mynshuwa kata ha u snem 2022-23. Ka ophis jong katkum ki jingkheiñ jingdiah kiba bniah da ka ophis jong ka PWD ka jinglut ka long kumba 20.00 crore (Arphew klur tyngka), hynrei haduh mynta ka sorkar kam shym pat la mang pisa satia.
Ka jingpynsahteng jong ka sorkar ban mang pisa ïa katei ka surok, ka pyni shai kdar ba ka don ka jingkwah burom bad kwah nam jong ki riew saiñ pyrthei tang na ka bynta ba kin ïoh jingmyntoi shimet bad kin ïoh vote ha ki por Election.
Lada ka long kumne ki riew saiñ pyrthei ki dei ban sngewthuh ba ha kine ki sngi ki paitbah kim dei shuh kiba biej. Ka sorkar ruh ka dei ban sngewthuh shai ba hadien ba la ïoh ïa ka jubab kaba biang na ka PWD kaba long ka sakhi ban pynshisha ïa ka jingleh buit poh jong ki riew saiñ pyrthei khlem da pyrkhat shuh ïa ka jingeh bad jing jynjar ki paitbah kan sa mih ka jingeh kaba khraw ka ban pynkieng janor wat ïa ka sorkar ruh, ong kitei ki riew rangbah.
