Lyngba ka jingthoh ujor ki paidbah nongrep sha ka MSPCB ba shah khanglad ban leit sha ka Publc hearing ka Shree Cement

Khliehriat Nailar 04: Ki nongrep bad ki nongshong shnong jong ka Shnong Shnongrim, Elaka Nongkhlieh, East Jaiñtia Hills, hynnin ka sngi ki la phah da ka jingthoh sha u Chairman & Member Secretary ka Meghalaya State Pollution Control Board (MSPCB) bad ki la pynpaw ka jingsngewkhia namar jingshah khanglad jong ki ban leit shim bynta ha ka Public Hearing jong ka M/s Shree Cement Ltd kaba la long ha ka 31 tarik u Naitung, 2026 ha Lum Syrman, elaka Nongkhlieh.
Katkum ka shithi, ki nongrep kiba mut ban leit shaka public hearing ki la ong ba ha ka por mynstep ki la shah khang lynti ha Lad Shnongrim N.E.C Main Road bad la don kumba 35 haduh 40 ngut ki briew kiba phong uniform pulit hynrei ki khlem don name tag ki la khanglad ïa ki nongrep, la kynnoh ruh ba kine ki briew ki la khanglad ïa ki paidbah kiba kwah ban leit pynsngew ia ka jingpyrshah jong ki ha katei ka Public Hearing.
Ki nongrep bad nongshong shnong ki la ong ba wat hadien ba ki la dep phah jingthoh ha ka 29 tarik u Naitung, 2026 bad kyrpad ba dei ban ailad ïa ki trai jaka ban leit shim bynta ha ka Public Hearing, hynrei pynban ki la shah khanglad hynrei ïa ki nongkyrshan jong ka kompani pat la shah ba kin leit. Ki la kynnoh ruh ba ha ka jingïakynad, ki la don ruh kiba byrngem da kaba sei bad pyni bomb ban pynbthei, kaba la pynlong ïa ki longkmie bad ki paidbah ban sheptieng bad ym nud ban leit shakhmat.
“Ngi la pynshang ban ïa kren bad kyrpad ïa ki hynrei kim shah satia, don katto katne ki long kmie ki la pyrshang ban ïakren, phewse katba dang kren ki la sei shuh kita ki bom ban pynbthei, hynrei da ka jingshlur kawei ka long kmie ka la bat ïa ka kti uta u ba mut ban pynbthei bad um ioh lad shuh ban pynbthei, ngi kum ki nongrep ha i jingsngew thuh ba rit jong ngi ngim kwah ban pyrshah ïa ka aiñ bad da ka jingsngew rit ngi la kohnguh ïa ki bor jong ka aiñ, hynrei kaba pynlyngngoh pat ïa ngi ka long ba haka juh ka por, ha ka juh ka jaka, la wan ki shi kynhun ki briew ki bym donhok don riti ha Lumsyrman kiba dei ki nongkyrshan jong ka M/S Shree cement Ltd ïa kine pat ki pulit ki ailad ïa ki ban leit sha katei ka public hearing” pynpaw ki nongrep ha ka jingthoh.
Shuh shuh ha ka jingthoh sha ka MSPCB ki la kyrpad da kaba ong “Sahep ba don burom namar ba ngim iohlad ban leit bad ban pynsngew ha katei ka public hearing ïa ka jingpyrshah jur jong ngi ban khlong mawshun ha ki jaka jong ngi, kumta ngi pynsngew ha phi ba da lei lei rüh em ngin nym shah ban pynjot bad khlong mawshun na ki jaka rep kba, ki Dam um, Nur um, Kper synsar, Brisoh. Kper kait jong ngi ha Lumsyrman bad ngi kyrpad jur ïa phi ba phin sngewbha ban shimkhia kat kum ka bor ba la bynshet ha phi bad ban phah jingtip sha ka sorkar lane ki tnad sorkar kiba dei peit ïa kane bad ngim shah ba kin ai kino kino ki N.O.C ne kiwei pat ki jait syrnot ïa ka M/S Shree cement Ltd halor ki jaka rep jong ngi ha Lumsyrman khnang ban lait na kino kino ki jing jia ba sngewsih hadien habud” bad la kyntu shuh shuh ïa ka Meghalaya State Pollution Control Board ba kan nym ai No Objection Certificate (NOC) ne kiwei pat ki jingbit sha ka M/s Shree Cement Ltd tad haduh ban da lah ban pynbeit ïa ki jingeh bad ban sngap ruh ïa ka sur jong ki trai jaka kiba shah ktah da ka project.
Ki nongrep ki la phah kopi ïa katei ka dorkhas sha u Deputy Commissioner ka East Jaiñtia Hills District, sha ka State Environment Impact Assessment Authority (SEIAA) bad sha ka State Expert Appraisal Committee (SEAC) Meghalaya ban leh ïa kaba donkam.