Ka kong (L) Christina Lamin, ka longkmie kaba une u Nongthoh u ithuh bha. Ka kong Christina ka long kawei na ki longkmie bad ka Nongdawa kaba shirtheman dawa ia ka Thain Lababg-Nongphyllut, Nongphyllut Doloiship ban pynwan na ka Jylla Assam sha Ri Jaintia Meghalaya. Lada phai sha ka liang ka jingngeit, ka kong Christina ka long kawei na ki longkmie riewngeit Katholik kaba bybgkong jong ka shnong Mukroh bad kaba nyngkong ban wan pynbna ia ka Khubor babha jong u Jisu Khrist ha ka shnong Kyarabon, Phlangmoorud bad Sarlong, Elaka u Doloi Nongphyllut.
Ka kong (L) Christina Lamin ka don san ngut ki khun shynrang bad kawei ka kynthei, kita u Prof.Dr. Henry Lamin, u Karnel, u Karmel, u Plasius, u Dr. Milinus bad ka kong Thelbina Lamin.
Baroh ngi ieid iala I Mei I Pa, kiba la pun, la kha,kiba la ri la sumar, kiba bsa, kiba bsiap, kiba pynheh pynsan, kiba pynnang pynstad ia ngi kumba ngi long mynta, ia kiba ieid bathoin da kaba tei ia ki Mot, ki Mawbynna ha ki Lumjyngtep ne ha ki Tpep ban pynsahnam pynsah burom ia ki, hynrei pat kine ki Mot bad ki Mawbynna ki shu sah hangtog khlem da ai jingmyntoi ia kiba bun kiba lang bad ia ka Jaitbynriew.
Haba phai sha kane ka bynta la dei ban iaroh ia ki Khun, ki Ksiew jong ka kong Christina Lamin ym tang ba ki tei da u Mot ne da u Mawbynna ban pynsahnam iala I Mei, ki tei syndon da ka Skul kaba la ai Kyrteng Christ School Mukroh kaba ai jingmyntoi ym tang ia kiba ha iing hasem, ia ka shnong ka thaw hynrei ia ka Jaitbynriew hi baroh kawei bad khamtam eh ia ki Nongshong shnong jong ka Thain Labang-Nongphyllut, Nongphyllut Doloiship, ki shnong kiba marjan ki bym pat don ki skul shnong kiba biang ne kiba heh Class ban ioh ia ka jingnang jingstad.Ka jingdon jong kane ka skul, Christina Lamin, kaba shu thoh lyngkot ” Christ School Mukroh” ka iarap shibun ia ki khynnah pule kiba wan na ki longiing kiba duk ki bym biang ka ioh ka kot,
Haba une u Nongthoh u la iohlad ban ia kynduh ia ki Khun,ki Ksiew jong ka kong (L) Christina khamtam ia u Prof.Dr. Henry Lamin, uba dei u khun phrangsngi jong ka kong Christ, u briew uba iohi jngai, uba niewkor ia ka jingnang ka jingstad, ka jingnangkot nangsla, ka jingnang thoh nangpule bad ka jingnang khein nangdiah, uba sngewkhia mynsiem ia ka jingsahdien jong ki briew ha ka pule puthi jong ki briew ka thain Labang-Nongphyllut bad kumba ki sngi ka jinglong khynnah jong ka, ka im ka sah ha ka shnong Kyarabon, kumta ruh ka jingangnud jong ki khun jong ka ban tei ia kane ka Skul (Christ School) ka long da ka jingthmu bad ka jingangnud bad plie lad plie lynti ia ki khun nongkyndong kane ka thain, ki shnong ki thaw kiba la shah ibein da ka Sorkar nadub ba la pynkhlad jubor ia kane ka Elaka u Doloi Nongphyllut, kaba long kawei na ki Katar Doloi jong ka Hima bah U Syiem Sutnga ia ka kham hadien ki Syiem Jaintiapur ba kin ioh ia ka jingnang jingstad.
Ka Skul ( School) ka la kiew ka kyrdan pule sha ka Secondary School bad une u Nongthoh uba dei iaid lynti sha ka shnong lyngba ka shnong Mukroh, um ju pep ban wan jngoh ia kane ka Christ School, ka skul ha kaba ki khynnah pule ki la nangbun nangbun na u snem sha u snem. Ka jingeh ia ki khynnah pule kiba wan na ki shnong kiba jngai ka long ka Iingshongwai naba ha Nongkyndong ki briew ki shna iing tang ban biang ialade bad halor kane ka jingeh kan jin dala bha ia kiba ha iing hasem jong ka (L) kong Christina, lada don ka lad ban shna de sa ki Hostel ban ioh shong iohsah ki khynnah pule kiba na ki shnong ba jngai kiba wan pule ha kane ka skul.
Une u Nongthoh u ngeit skhem ba u Prof. Dr. Henry Lamin uba la long shisien ka sngi u MLA,u Cabinet Minister u bat ia ka Education, u Pro Vice Chancellor,uba bat teng ruh ia ka kam Acting Vice Chancellor NEHU,uba mynta u President ka Shillong Commerce College bad u Founder ka Skill Development College NEHU, Wahiajer un shimkhia ban thaw ki lad ki lynti ban shna ban tei de sa ki Hostel na ka bynta ki khynnah pule kiba na jngai kiba wan pule ha kane ka skul kaba ki la pynsahnam sahburom iala I Mei, (kong Christina Lamin) ka skul kaban nangkiew na ka Secondary sha ka Higher Secondary bad hadun ka College ha ki snem ki ban dangwan bad ban nangpynkhraw shuh shuh ia ka nam bad ka burom jong ka kong (L) Christina Lamin.
