Ka seng ka phah hiar shuki ïa u Professor Barik na bynta baroh ki samla pule, ym tang ïa ki seng NEHU: HYC

Shillong, Nailar 03: U President ka Hynñiewtrep Youth Council (HYC) Sengkmie u Bah Roy Kupar Synrem u la kynthoh kylla ïa ki seng kiba don ha NEHU, ka NEHUTA bad ka NEHUSU halor ka jingkynnoh jong ki ïa ka seng HYC ba ka leh saiñ pyrthei haba ïadei bad ka jingleit ai shithi ïa u Professor S K Barik ba un hiar shuki don burom na ka kam Incharge Vice Chancellor ka NEHU halor ka jingkynnoh ba ka la don ka jingpynkheiñ ïa ka NEHU Act bad ki Statutes jong ka.
Haba kren sha ki lad pathai khubor u Bah Synrem u la ong ba ka seng kam shym la tuklar ïa kane ka kam na ka daw ka saiñ pyrthei hynrei na ka bynta ka bha ka miat jong baroh ki samla pule bad ki college kiba pynïasoh bad NEHU, ym tang na ka bynta jong kita ki seng kiba don hapoh NEHU.
U Bah Roy u la ong ba ka Ministry of Education ka Sorkar Pdeng haba ka kyntiew kyrdan ïa u Professor S K Barik ka la pynkheiñ ïa ki kyndon aiñ ka NEHU namar ha ka jaka ban phah shimti shipor ïa u Senior Most u Professor R Khongsdier, kat bym pat ïoh ïa u VC ba pura kaba lah ban dang shim por.
Kaba jubab ïa ki jingkylli halor ka jingbym don ryngkat jong ka HYC ha ki 2 ne 3 snem ba ïakhih pyrshah ïa u Professor Shukla, u President ka HYC u la ong ba ki dkhot ka seng naduh kitei ki por ba don ka jingïakhih kaba jur ha NEHU ki la donlang ban ai mynsiem ïa ki samla pule bad mynta ka kynti ruh ka seng ka mih sha khmat namar la ïohi ba naduh ba la kut ka samoi treikam u VC barim u Professor Shukla ha ka 26 tarik ym don kita ki seng ha NEHU kiba mih shakhmat ban pyrshah ïa ka jingpynkheiñ aiñ bad kyndon haba ka Ministry of Education ka aiti ïa u Professor S K Barik ban pynïaid ki kam ka NEHU shipor.
U la ong ba kitei ki seng ki la kam ruh ba la tyrwa ïa u Professor R Khongsdier ban shimti ïa ka kam VC haduh 3 sien hynrei um treh kumno mynta pat la pyrshah ïa u Professor Barik, u Bah Roy u la buh jingkylli ba kumno u Professor Khongsdier un shimti ia ka shuki haba dang don jingïakhih bad kynrum kynram.
Kumta u la ong ba ka jingkwah ban shimti u Professor S K Barik ïa ka kam Incharge VC ka pyni ba ka dei tang ka kam pynsngewbha bad na ka bynta ka jingmyntoi jongno jongno.
Kumta u la ong ba ka seng ka kloi ban ïatai bad ka NEHUSU bad NEHUTA halor kane ka mat, hynrei pynpaw pat ba ka seng ka ïeng halor ka nongrim ban ym ailad ïa ka jingpynkheiñ ïa NEHU Act bad ki Statutes jong ka.
Shuh shuh u nongïalam ka HYC u la ïathuh ruh ba ha ka por ba dang don ka jingïakhih hapoh NEHU u Professor S K Barik u la leit ban shimti ïa ka shuki incharge Vice Chancellor hynrei tang shi sngi u la shah buh jingkylli ha ka Ministry of Education ba nangno u la ïoh ka bor ban shong ha ka shuki VC, kumta kumno hi ruh u Professor nalor ba u la dei uba senior most un treh ban shimti ïa ka shuki wat la u dei hok ban shimti, naba ha katei ka por ka dang don ka jingïakhih pyrshah ïa u Professor Shukla.
Kumta halor kane u Bah Roy u la ong ba ka seng ka la phah ruh da ka jingthoh sha u Secretary ka Higher Education ka Ministry of Education ba un tih bniah halor kano ka nongrim ba ka Ministry ka la ai hukum ban phah shimti ïa ka shuki VC ba shipor ïa u Professor S K Barik nalor ba la pynkheiñ ïa ki aiñ jong ka NEHU bad ïa ki statutues jong ka.