2 snem hadien ba buh mawnongrim u CM, la plie ïa ka madan Artificial Turf ba 10.93 klur ha Umbuda

Nongpoh, Nailar 03 : Hadien 2 snem tam ba u Myntri Rangbah duh ka jylla u Conrad Sangma u la buh mawnongrim ban tei ïaka madan Artificial Turf ba nyngkong ha Ri-Bhoi District, hapdeng ka jingkmen bad ka jingap khmih lynti na kiba bun ki samla lehkai la lah ban plie paidbah noh ïa katei ka madan kaba la tip kum ka Umbuda Artificial Football Turf haka Shnong Umbuda.
Ïa katei ka madan kaba la tei haka rukom kaba paka haka jinglut kumba 10.93 klur la wan ban plie paidbah da u Bah Sosthenes Sohtun Myntri ka tnad C&RD bad GAD ka sorkar jylla haka jingdonlang u Bah Mayral Born Syiem MLA ka Nongpoh kum u symbud kongsan, u Bah Damanbait Lamare MLA ka Umroi, u Bah Banteidor Lyngdoh MLA ka Mawkynrew ba dei ruh u President ka Shillong Sports Association, u Dr Abhishek Saini Deputy Commissioner ka Ri Bhoi, u Giri Prasad Superintendent of Police ka Ri-Bhoi, ki sahep sorkar naka district, ki nongïalam shnong, ki nongïalam jong ki Sports Club bapher bapher ka District bad kiwei kiwei.
Ïa katei ka madan yn peit bad khmih da ka Mawroh Umbuda Management Committee ban sumar bad kumjuh ruh ban pynïaid ïaka.
Haba kren ha kane ka sngi naka liang u Bah Sosthenes Sohtun kum u kongsan bad u Bah Mayral Born Syiem kum u symbud kongsan kila ong ba kane ka long ka jingkyrkhu kaba khraw ïaki samla ka district namar kane ka dei ka madan ïalehkai kaba nyngkong ban siang da ki phlang plastic ba ki samla ka district kin ioh ban kilan bad ban pynïaid ruh ïaki tournament bapher bapher bad ai khublei ïa baroh kiba la don bynta ban pynurlong ïa kane ka project.
U Bah Sohtun kum u Myntri u la ong ba kane baroh kadei ka jingshimkhia jong ka sorkar MDA II hapoh ka jingïalam u Conrad K Sangma ban kyntiew ïaki kam ïalehkai haka jylla bad ban wanrah ïaki kam pynroi bapher bapher khamtam ban kyntiew ïaki kam ïalehkai sport shuwa ban pdiang ïaka National Games haka jylla.
U Bah Mayral Born Syiem kum u MLA u la pynpaw ka jingsngewkmen ba nalor katei ka madan artificial turf mynta ka madan Synthetic Athletic track ka dang ïaid shaphrang ha Pahamsyiem kaba dei ka project ba palat 14 klur ban dang kyntiew shuh shuh ïaka kam lehkai haka district bad ka jylla.
La pynkut ïa kane ka sngi da ka jinglehkai paralok hapdeng ka kynhun ki MLA XI pyrshah ïaka Officers XI kaba la pynshongshit ïaki paidbah da ka jingshim bynta shitrhem ki MLA ka jylla bad kumjuh ruh ki ophisar naka district bad hapdeng ka jingïakhun kaba jur ka Officers XI kala lah ban pynliem noh ïaka MLA XI da 3-1 kol.