Ban sakhi ïa ka jingplie u MR ïa ka ‘Nasha Mukt Yuva: Viksit Bharat Sankalp Abhiyan’

Nongpoh, Nailar 02: Ki samla pule jong ka skulbah University of Science and Technology Meghalaya (USTM) mynta ka sngi u Blei kila snohkti lang ban sakhi ïaka jingplie u Myntri Rangbah duh ka ri India u Narendra Modi ïaka Nasha Mukt Yuva: Viksit Bharat Sankalp Abhiyan na nongbah Delhi bad ïa katei ka jingïalang la pynlong ha Central Auditorium jong ka katei ka skulbah, ba kum ki samla kin long ki atiar ban ïakhun pyrshah ïa ka jingdih drok bad kiwei ki jingdih buaid, bad ban kyntiew ïa ka jingim kaba koit ba khiah.
Haba ai jingkren sha ki samla ka ri, u Myntri Rangbahduh ka ri u Narendra Modi u la ban jur ba ki samla ka ri India ki dei ka bor kaba khraw tam jong ka ri kaba la kiew sted haki liang baroh bad u la khot ïa uwei pa uwei u samla nongshong shnong ban ïashim bynta shitrhem ban pynlong ïa ka ri India kaba lait na ki jingdih buaid khamtam u drok. Da kaba pynksan ba ka jingbun ki samla kiba koit ba khiah, kiba don ka akor, bad kiba don ka bor ka dei ka nongrim jong ka Viksit Bharat, u Myntri Rangbahduh u la kyntu ïa ki jaka pule, ki longïing, bad ka imlang sahlang ban ïatreilang ban pynduhjait ïa ka jingdih buaid bad ban pynroi ïa ka jingsngewthuh, ka jingkitkhlieh, naka bynta kumno ban tei ïaka ri baroh kawei.
Ïa ka prokram bala pynlong ha skulbah USTM nalor ki hajar ngut ki samla pule la shim bynta ruh da u M. Hoque, Chancellor USTM, Prof. (Dr.) G. D. Sharma, Vice Chancellor, u Nipon Hajong, Additional Deputy Commissioner, Ri Bhoi, u Bah Jonathan Marbaniang, Scientist & District Informatics Officer, NIC, Ri Bhoi, u Bah Wanrapbok Kharshandi, Network Engineer, NIC, Ri Bhoi, u Prof. (Dr.) A. C. Kataki, Director, Medical Administration, USTM bad kiwei kiwei.
Naka liang u M Hoque kum u Chancellor katei ka skulbah u la pynpaw ka jingsngewkmen kaba khraw halor ka jingioh bynta ka skulbah USTM ban sakhi ïaka jingkren markhmat u Myntri Rangbah duh ka ri ïaki samla bad ai khublei khamtam ïaka sorkar India bad ka sorkar Meghalaya kaba la jied ïa katei ka skulbah kum kawei naki shlem pule ban sakhi ïaka jingkren u Myntri Rangbah.
Naka liang ki samla pule naduh ki nonghikai, ki nongtrei, ki NSS volunteer kila shim ruh ka jingbam smai ha kane ka sngi ban kiar naki jingduh buaid khamtam u drok bad ban pynlong ïaka ri India kaba lait na u drok bad kaba kiew shaphrang haki liang baroh.