Shillong, Naitung 31: U nongïalam ka seng United Democratic Party (UDP) bad nongaibuit ka tnat Social Welfare u Bah Paul Lyngdoh ha ka sngi Thohdieng ula pynksan ïa ka jingpynkynriah ïa ki nongdie madan na Khyndailad bad ong ba kane ka dei ka nuksa jong ka jingpynroi sor kaba paka, kaba ai ha ki ïa ki lad ki lynti ha ka jaka kaba ki la lait na u slap ka lyer, ka jaka kaba biang ka um, ka jaka leit bar ha ka jaka ban shu kyndang jubor ïa ki.
Hadien ba la kut ka prokram jong ka tnat Social Welfare hapoh State Guest House ha Taraghar, u Bah Paul u la ong, “Nga dap da ka jingkmen namar ba nga lah long shi bynta jong ka kynhun. Nga lah lamkhmat bha ban ïaleh ha ka ban pynkylluid ïa ka thaiñ Khyndai Lad kumba ka long haduh mynta mynne.”
Shuh shuh na ka liang jong u, u la ong, “Kane kadei tang shi bynta jong ka jingkyntiew ïa ka kam pynroi kaba salonsar ha sor, ïa kaba ngim shym la shu bret ïa ki briew, hynrei ngi lah pyntei ïa ki jaka na ka bynta ka jong ki kiba biang.”
Na ka liang u Bah Lyngdoh, u la ong ba ka jaka thymmai ka ban shong die jingdie kadei kaba la buh ïa kiba bun ki jingdonkam kiba kiba die madan ki lah ban pyndonkam ïa ki, ym kumba long mynshwa.
Na ka liang jong u, u la bynrap, “Kitei ki jaka ki don ïa kiba bun ki jingdonkam, kum ka um, bording elektrik, ki jaka leit shabar bad ki jingpynmih ki jong ki. Ki nongdie ki ïoh jingïada na ki riewsniew namar ba la tei bha ïa kitei jaka shong die jingdie.”
Haba kren halor ka jingkynnoh halor ki jinglong jingman ka Khyndai Lad kaba mynta ka la dap satang da ki jingpynsawa kum ki jingtem jingput bad kiwei, u Bah Lyngdoh ula kdew ba kila don la ki jong ki jong ki rukom pynsngew jong ki paidbah, hynrei ka don ruh pat ka jingshngaiñ. “Haba ki nongdie madan ki la mih noh na katei ka jaka, ki paidbah kila ong ba ka Khyndailad ka la sdang kynjah. Mynta haba la buh pat ïa ki nongtem bad nongrwai, phi ong ba ka Khyndai Lad ka la kylla long kaba sawa bha. Kumta kiei kita ki lad kiba phi kwah?” buh jingkylli u Bah Paul Lyngdoh.
