Ki paidbah ki dei ban khot sngewbha ïa u Nongmihkhmat ban wan da ka kali remdor sha Mawhati: Dr. Mukul

Nongpoh, Naitung 24: U nongïalam ka liang pyrshah u Dr. Mukul Sangma u la ther tyngeh halor ka jinglong jingman ka synshar khaddar bad ka saiñ hima sima haka jylla ha kine ki 4 snem bala leit noh hapoh ka jingsynshar jong ka sorkar MDA bala lamkhmat da ka NPP kiba la kylla khongpong lut ïa kaei ka kaba ka sorkar hapoh ka jingïalam jong u kala leh haki snem bala leit noh mynba u dang long kum u Myntri Rangbah ka jylla, haba kren haka jingïalang ka party All India Trinamool Congress kaba la long haka shnong Umlaper haka sngi Saitjaiñ ban pynsuhthied bad pynkhlaiñ ïaka party TMC ha Mawhati Constituency.
Haba kren halor ka jingsahdien jong ka Mawhati Constituency u Dr. Mukul Sangma u la ong “Ki paidbah jong ka Mawhati Constituency kila jied ïa u Bah Dasakhiatbha Lamare kum u nongmihkhmat bad u la long ruh u myntri ka sorkar MDA, hynrei ka long ka jinglehraiñ wat ban rung sha Mawhati ha kaba ki paidbah kila shah pynbiej bad ïa kane la sakhi ruh halor ka jingsahdien ka Mawhati naduh u surok, ki jaka pule, ki jaka sumar bad ka roi ka par ha baroh ki liang, hynrei ki paidbah kila shah shet kylla ha kaba la iohi pynban ba u nongmihkhmat u pynsngewbha ïalade da ka kali remdor bad thmu ban leit ïakhun pat na kawei ka Constituency”.
Ngi iohi ba u nongmihkhmat bala jied da ki paidbah ka Mawhati u thied da ki kali rem dor, hato u nud ban wan da kato ka kali sha kane ka thaiñ? ki paidbah ka Mawhati ki dei ban khot kyrpang ïa u nongmihkhmat ban wanrah da kato ka kali sha katei ka thaiñ, ther u Mukul Sangma halor ka jinglong jingman u surok bad ka jingsahdien bala palat jong ka Mawhati Constituency da kaba bynrap ruh ba ki nongmihkhmat mynta kim dei shuh ki nongthaw aiñ hynrei ki dei ki nongkhaii bad nongkamai spah ba ki paidbah mynta ki hap ban ïaid ïaka lynti ba khohruh khohram nalor ka jingjngai.
U la ong ruh ba ka sorkar NPP kam ïapher eiei naka BJP, ha kaba ngi la sakhi dala ki jong ki khmat katba ka thaiñ Shatei Lam mihngi ki dang pyrshah ïaka aiñ iakjakor CAA, baroh ki party kiba don haka sorkar MDA ki kyrshan pynban ïa katei ka aiñ, bad kaba pynpaw shai shuh shuh ba ka party NPP ka dei ka ñiangkohnguh jong ka BJP kadei halor ka kam pynbeit pud pynbeit sam dang shen da kaba ai lut wat ïaki jaka puta ba hap haka jylla Meghalaya kaba naka liang jong u mynba u dang long myntri rangbah u la phah ïaki kot ki sla ban kam lut ïaki jaka kiba dei hok jong ka jylla Meghalaya, hynrei la pynkylla lut bad leit soi pynban ïaka MoU kaba ai lut ïaki jaka ka jylla sha Assam da ki phew akar.
Haba phai sha ka thungkam thungjam bun ki samla ki mad jingeh watla ki don shibun ki kam kiba lait haki ophis sorkar, namar ka sorkar MDA kam don ka jingkitkhlieh, hynrei la iohi pynban ba ki nonghikai ki hap ban thiah surok, ki nongtrei ASHA ki hap ban mih surok, ban dawa ïaka tulop ban pyndap ïaka iing ka sem, Hato mano ba kitkhlieh? Da kaba kren shai ruh ba ha jylla Meghalaya ki don tang 2 bynta ki bor synshar haka saiñ hima sima haka jylla, ka Trinamool Congress ha kawei ka kti, ka NPP bad kiwei kiwei ki party ha kawei ka kti.
Lyngba katei ka sngi ka jingleit hiar jong u Dr. Mukul Sangma sha Mawhati Constituency la lah ruh ban pynsuhthied nyngkong ïa katei ka party ha katei ka thaiñ ha kaba la jied ruh ïaki nongïalam ka Mawhati Block Committee bala shimti da ka Dr. Saralin Dorphang kum ka President kaba dei ruh ka kyrtong ban ïakhun naka party TMC haka elekshon ban long ha u snem 2023 bad la ioh ruh ban plie ïaka ophis treikam ba pura.
Naka liang u Dr. Mukul Sangma u la khot ruh ïaki paidbah ha katei ka sngi ba kidei ban sngewthuh shai ïaka nongrim jong ka party TMC naka bynta ban wanrah ki jingkylla ha ka thaiñ Mawhati bad ka jylla baroh kawei.