Tura, Naitung, 24: Ki shipai Border Security Force (BSF) kiba la ïoh ïa ka jingtip kaba bniah ha ka sngi Saitjaiñ ki la pynlong ïa ka khynra bad ki Pulit ka Jylla ha kaba ki la ïoh kurup haduh 3200 bilor ka dawai Phensedyl ba la buhrieh ha kawei ka khlaw kaba hap hapoh ka thaiñ Jatrakona, South Garo Hills district, Meghalaya.
Kine ki dawai Phensedyl ba la ïoh kurup ki shongdor antad haduh 6 lak.
Ki shipai BSF ki la ïoh jingtip ba ki don shikit ki dawai Phensedyl ba la buhrieh ha ka jaka khlaw ha Jatrakona na ka bynta ban shalan tuh sha ka ri Bangladesh lyngba ka khappud. La mana ban dih kyiad ha ka ri Bangladesh namarkata ka jingdawa ïa kane ka dawa ka jur bha ha katei ka ri.
U Public Relation Officer (PRO) jong ka tnat shipai BSF u la ong ba ki shipai pahara khappud ka ri India bad ka ri Bangladesh ki ju ai jingtip manla u bnai halor ka jingïoh kurup ïa ka dawai phensedyl, ïa u drok bad kiwei de ki jingdih pynbuaid ha shilynter ka khappud.
