100% la kynjoh ka SIR ha baroh 5 tylli ki Constituency ha Ri Bhoi District, ai khublei u DC ïa ki Sahep

Nongpoh, Naitung 30: Hadien ka jingtrei shitom jong ki ophisar ka tnad election hapoh ka jingbthah jong u District Election Officer ryngkat ka jingïatreilang jong ki paidbah, ki nongïalam shnong, ki seng saiñ hima bapher bapher, ka Special Instensive Revision (SIR) kala ïaid beit ïaid ryntih ban pynrung ïaki kyrteng haka thup electoral roll ha baroh 5 tylli ki constituency ha Ri-Bhoi District bad la lah ban pyndep lut 100%.
Kumba 2,05,735 tylli ki Enumeration forms la sam ha baroh kawei ka district bad baroh la dep ban digitised lut kaba la long 100% jong baroh ki nongthep vote haka district.
Ka jingsam ïaki enumeration forms bad ka jingdon ki nongthep vote haki constituency bapher bapher ha Ri-Bhoi ki long kumne, 8-Mawhati ki don 42861 ngut, 9-Nongpoh ki don 40943 ngut, 10-Jirang ki don 44173 ngut, 11-Umsning ki don 42386 ngut bad 12-Umroi ki don 35372 ngut.
Naka liang u Deputy Commissioner (EL) u la ai khublei ïa baroh ki nongthep vote, ki paidbah, ki nongïalam shnong, ki seng saiñ hima khamtam ïaki ophisar kiba la trei shitom naduh ba sdang ban pynurlong bad pyndep ïaka SIR haka por kaba biang kumba la buh da ka Election Commission of India.