Ban dep kloi ka jingker sainar ha khappud ai jingmut ka jylla ïa ka sorkar pdeng ban shu thied noh ïa ki jaka

Shillong, Naitung 29 : Ka Sorkar Jylla ka la tyrwa ba ka Sorkar Pdeng kan shu thied ïa ki jaka hapoh ka 150 yard na khappud ka India-Bangladesh khnang ban lah pynïaid sted noh ïa ka jingker sainar bad ban ai jingïada ïa ki nongshong shnong ha khappud, ong u Symbud Myntri Rangbah Bah Prestone Tynsong ha ka Sngi Balang.
Haba kren sha ki lad pathai khubor, u Bah Prestone, uba bat ïa ka tnad kam pohïing (police), ula kdew ïa ki shnong ha ki jaka kum ka thaiñ Pynursla kaba don tang 50-60 meter na u mawpud. Hapoh ki kyndon ba don mynta, ka jingkersainar ka dei ban long 150 yard shapoh u pud ka India.
“Lada ngi bud beit thik ïa ka kyndon 150 yard, bun ki shnong kin hap shabar ka jingker. Kane kan pynlong ïa ki ban hap hapoh ka no man’s land” ong u Bah Prestone.
“Ngim pyrshah ia ka jingker sainar. Ngi donkam ïa ka. Hynrei ngim lah ban shu ieh ïa ki briew jong ngi ba kin nym ïoh ïa kino kino ki jingïada”.
Ban weng ïa kane ka jingeh, ka Sorkar Jylla kala thoh sha ka Ministry of Home Affairs bad pynlong ruh ïa ka jingïakren bad ki shipai BSF lem bad ka NBCC, ula bynrap.
U Bah Prestone ula ong ba ka Sorkar Meghalaya ka la ai jingmut ïa kiwei pat ki lynti.
“Lada ym lah ban pynjynsur ïa ka 150 yard, ka Sorkar India ka dei ban shu thied ïa ki jaka khnang ba yn lah ban pynkynriah ïa ki nongshong shnong bad ki nongrep sha ki jaka kiba shngaiñ”.
Ka jingtyrwa, u pynpaw, kan pynbiang tarajur ïa ka jingdonkam ban wanrah ïïa ka jingshngaiñ ka ri bad ka kamai jakpoh lem bad ka jingshngaiñ ki briew kiba sah ha khappud.