Bthah ka Sorkar jylla bymbit ban pynkup burom ïa u CM, Dy.CM, Sahep ha ki jingïalang jong ka sorkar

Shillong, Naitung 29 : Ka Sorkar Jylla ka la pynmih ïa ka hukum ba bthah ïa ki Tnad bapher bapher ba kim bit ban pynkup burom ïa u Myntri Rangbah, ki Symbud Myntri Rangbah, Myntri Sorkar ne ki Ophisar ha kino kino ki jingïalang jongka Sorkar.
ïa kane ka hukum la pynmih da ka Secretary ka Tnad Personnel & AR (A) Kong Isawanda Laloo ha ka sngi Balang.
Hynrei kala ong pat ba ïa kane lah ban pynlait noh tang ha ka khep ba khot ïa ki Myntri ka Sorkar Pdeng lane ki Heh nabar Ri ban ïashim bynta ha ki jingïalang jongka Sorkar.
Ka ong, ba naduh mynta, ha ka jaka kane, ki Tnad ki dei ban pynkup burom ïa arngut lane lai ngut na ki riew paidbah ha kum kine ki jingïalang bad lada ki i ïahap, ki lah ban ai ïa ka lad ba kin ai jingkren katto katne minit ha ka jingïalang.
La bthah ïa baroh ki Tnad ba kin pyntreikam pyrrkhing bha ïa kane ka jingbthah.