Shillong, Naitung 28 : Ka Khasi Student Union (KSU) Jaintia Hills District Unit ka la kyntu ïa ka Meghalaya State Pollution Control Board ban pyndam ïa ka jingbishar paidbah ne Public Hearing jongka karkhana dewbilat M/s Shree Cement Ltd na ka bynta ka projek ha Lum Syrman namar kane kan ktah jur ym tang ïa ki wah, ïa ki doh ba im ha wah hynrei wat ïa ki sawdong sawkun jongka mariang.
Ha ka shithi ba la phah da ka KSU ka la pynpaw ba kane ka jaka ba thmu ban tih mawshun ka la ktah ïa ka wah Litein bad ka EIA kaba la pynmih ha ka sla ba 160 ka la kdew shai ba kane ka projek kan ktah ïa ki wah kynthup ïa ka wah Litein.
Ka Seng ka la maham ba ka lah ban jia ban pyntuid sha wah ïa ki jakhliah kiba mih na ka karkhana kumta katba ym pat rai ban ym ktah ne tih mawshun ha ki jaka kumba 1 km na ka wah ka seng da lei lei kan ym ailad ban seng ïa katei ka karkhana bad kan ïeng ban pyrshah beit haduh ba kut.
Ka seng ka la pynpaw ba ka la lap ruh ïa shibun ki jingbym bit bym biang ha ki kot ki sla jong ka kompani. Kawei na ki kaiphod ka kdew ba ym don wah bad khlaw sorkar ha ka jaka ba 10 km na katei ka jaka ban seng ïa ka karkhana katba ka kaiphod EIA pat ka pynpaw ba ka don mar jan ka wah Litein bad ka khlaw sorkar kata ka Saipung Reserved Forest.
Ka EIA ka kdew ruh ba kumba 49.78 % ka jaka ban don ka projek ka dei kaba la tap da ki khlaw ki btap ba im ki mrad bapher bapher kum ki Cappe Langur, ki Leopard, Great Pied Hornbil bad ki Himalayan Vulture. Kumta lada shah ban tih mawshun kan ktah jur ia ka jingim kine ki mrad kiba lah ban duh jait noh.
Kumta ka KSU ka pyrshah jur ïa ka public hearing kaba la buh ban long ha ka 31 tarik mynta u bnai naduh ka por 8 baje mynstep. Ka dawa namar kata ban pynsangeh mardor ïa katei ka public hearing.
