Hiran ka ïoh ka kot bad ka kamai kajih ki paidbah nongrep bad nongkyndong

Nongstoiñ, Naitung 27: Ha u snem 2018 ki nongïalam ba hakhmat jong ka seng NPP kaba ïalam mynta ïa ka sorkar, ki la kren shai ba ka thong ba hakhmat eh jong ka sorkar, ka dei ban kyntiew nyngkong eh ia ki nongkyndong. Hynrei, kumba long mynta kane ka sorkar ka dei tang ia kito ki briew kiba ia jan bad ka lane kita ki High Level.
“Katba nang mih ki sngi ka ïoh ka kot ha West Khasi Hills ka la nang jur haduh ba ka la ktah haduh katta katta ïa ki paitbah, naduh ki jaka sor haduh ki nongkyndong”, ong u bah Tonington Tyrsa uwei na ki riew rangbah ka thaiñ Maweit haba ïakren bad u nongthoh khubor.
“Ha shuwa u snem 2020 ha ka por ba u khñiang jingpang Corona virus um pat mih pyrthei bad wat la ka sorkar ka la khang ïa ka jingtih bad shalan dewïong ruh, ka jinghiar ka ïoh ka kot kam pat long haduh katne. Hynrei naduh ba ka sorkar ka la pyntrei kam ïa ka aiñ ban khang dam ban lait na ka jingsaphriang jong u corona, ka jinghiar ka ïoh ka kot ka la kham jur bad bteng haduh mynta”.
Watla ka sorkar la weng noh ïa ka jingkhangdam pynban ka ïoh ka kot ka la nah hiar arsut kat haduh ba ha kine ki sngi ka jinghiar ka ïoh ka kot ka la sar naphang kum ka khlam kat haduh ba ki paitbah ki la shem jingeh bad dum ka buit ka stad balei ba ka long kumne.
U bah Tyrsa u la ong ruh ba haba u peit ïa ka jinglong jingman ha ki thaiñ nongkyndong kum ha Maweit, la isangsot hi khait khamtam ïa kiba pang ba shitom, namar ba tang ka bai kali ban leit phah sumar ha Nongstoiñ ruh ki la shem jingeh ban ïoh kat haduh ba wat la ki pang ki shitom katno katno ruh, ki hap ban ïatur beit tang ha ka PHC kaba don ha Maweit hi. Lait nangta kim don lad satia ban leit phah sumar sha kiwei pat ki jaka.
U la ong ruh ba ha ki snem ba kham mynshuwa ka ïew Maweit ka shit ka shngaiñ, ki nongkhaïi na Nongstoiñ bad kiwei kiwei ki jaka, ki ïatur bha sha katei ka ïew. Ki nongrep ka thaiñ ki heh mynsiem namar ba ïa ki mar rep kum ki soh ki pai, ki jhur ki jhep bad kiwei kiwei kim donkam shuh ban leit die sha kiwei pat ki jaka namar ki nongthied ki la wan hi sha ïew Maweit.
Hynrei, ha kine ki sngi ki snem ba la leit ka ïew ka hat ka kynjah sam sam bad ki nongkhaïi kiba shong dukan ki shu shong kai baroh shi sngi bad haba peit imat tang ka bai sha sngi ruh kim ïoh namar ka jingbym don ki nongthied nong pet. Ki don ki nongkhaïi kiba wan na Nongstoiñ hynrei tang ka bai leit bai wan ruh imat ki shitom ban pynmih.
U la ong ba ki nongrep lei ki shem shitom haduh katta katta namar lada pynkit ïa ki mar rep shaduh Nongstoiñ ruh tang ka bai kit ym lah ban pynmih, namar ka jinghiar dor ki mar rep ka la long shaba palat katba ki mar ki mata kiba wan na sha kiwei pat ki jylla pat ki kiew dor man la ka sngi.
Kumta halor katei ka jingeh utei u rangbah u la ong ba ha kaba kum kane ka khep, ka sorkar ka la dei ban phai khmat sha ki nongkyndong bad ban thaw ki lad ki lynti, kumno ban kyntiew ïa ka ïoh ka kot bad ban peit bniah ïa ka rukom pynïaid ïew ïa ki mar rep ba ki nongrep ki pynmih. Namar lada ka sorkar ka ñiewkor ïa ki nongrep kan eh aïu ban thaw ki lad ki lynti na ka bynta ban kyntiew lem ïa ka ïoh ka kot, ka kamai kajih jong ki pait nongrep.