Klumar ka ophis u Acting Syiem Hima Mylliem ba jah rngai ki kot ki sla ba kongsan

Shillong, Naitung 27: Ka ophis jong u Acting Syiem ka Hima Mylliem hadien ka jingshimti ïa ka ophis trei kam kala lap ba ki don haduh saw tylli ki file kiba kongsan ym shym la lap satia ïa ki shano ki don bad kane kala pynklumar jingmut ïa ki kumno ban pyniaid shaphrang ïa ki kam.
Haba ïa kren bad u Mawphor, u Acting Syiem ka Hima Mylliem u Paiem Alban Fedrick Syiem u la ong ba ki don kumba saw tylli ki file ba kongsan bha kila shu jah bad khlem lap ksai na ophis naduh ba shah sospon u Ainam Manik Syiem kum u Syiem ba pura jong ka Hima.
“Kane kala wanrah ka jingklumar ba khraw ïa ka ophis bad kumjuh ruh ïa ka tnad ba dei peit ba kumno kin pynïaid sha khmat ïa ki kam jong ka ophis bad kane ka la long ka jingeh ba khraw” ong u Paiem Alban.
Kane kala paw hadien ba u nongthoh khubor jong u Mawphor u la pyrshang ban wad jingtip na ka Hima Mylliem halor ka jingpyntrei kam ïa ka skhim ba la pynbna da u Myntri Rangbah u Conrad K Sangma na ka bynta ban shna pynitynnad ïa ka Ïewduh hi baroh kawei.
“Ngi la pyrshang ban wad ïa ki file hapoh ophis hynrei ym shym la lap satia bad lada jia ba ngim lap, ngim banse ban thoh sha kito ki myntri kiba bat ïa ka tnad ba jah rngai ka file ba kin pyntip shano ki buh bad shano ki don” ong u Paiem.
U Paiem u la ong, “Lada ngi lah dep ban phah da ka jingthoh sha kito ki myntri kiba peit ïa ki tnad bapher bapher ba jah rngai noh ki file mynta bad lada kim jubab ne pynphai ngim banse ban ujor noh da ka ejahar sha ki pulit”.
Haba bynrap lang kiwei ki myntri kila pynpaw ba ka file kadei ban don beit namar ba ïa ka jingtrei kaba la pynbna da u Myntri Rangbah ban pynbha bad pynitynnad ïa ka iewduh kidei ban don jingtip na ka liang jong ka ophis.
Kumba tip halor ka jingpyntrei ïa ki kam pynbha bad pynitynnad ha iewduh la leh da ka ophis jong ka tnad pynroi sor ne Urban Affairs namar ba ka pisa kam shym la rung shapoh jong ka Hima Mylliem, hynrei ka shu ai syrnod haba kila dep katkum ka wad (phase).