Dang bun ki mat ba hap ban shimkhia da u Acting VC ba thymmai: NEHUSU

Shillong, Naitung 27: Ka North Eastern Hill University Students’ Union bad ka KSU NEHU Unit ka la pynpaw ïa ka jingsngew kmen halor ka jingmih noh jong u Vice Chancellor Prof PS Shukla bad kila kyntu ruh ïa ki bor pynïaid ban shimkhia ïa ki mat ba sahteng na ka bynta ka jingpynïaid ïa ka skulbah bad ki mat ba ïadei bad ka pule puthi nangne shakhmat.
Katkum ka jingong jong u General Secretary ka NEHUSU u Martin Warjri ula ai khublei ïa ki kynhun baroh, ki Dorbar Shnong, ki kynhun ki samla pule bad ki kynhun ka imlang sahlang kiba la kyrshan ïa ki jingïakhih kaba ki la pynlong naduh kaba sdang kat haduh kine ki sngi.
U la ong, “Ngi ai khublei ïa baroh kiba la ïeng ryngkat lang bad ngi. Mynta ka sngi, ngi dap da ka jingsngewtynnad ban pynbna ba u Prof. Shukla um don shuh ha ka NEHU campus. Ka skulbah mynta ka la long kaba laitluid na kito kiba la kiar ban shim ïa ka jingkitkhlieh ïa ki jingeh kiba la mad da kane ka skulbah.”
Shuh shuh u nongïalam ula leit ban ïa kynduh ïa u Acting Vice Chancellor Prof SK Barik bad aiti ïa ka dorkhas ban pynpaw ïa ki jingsngewkhia kiba la shu ieh kumto ha kine ki snem kiba la dep ha kane ka skul bah.
U Bah Warjri ula ong, ba kila ïa pynleit jingmut ha kaba ïadei bad ka jinglong jingman bad ïa ka jingkitkhlieh jong ka skulbah. Kawei na ki mat kaba kongsan kaba la pynpaw kadei halor ka jingthungkam ha ka kyrdan Registrar In-charge bad Finance Officer In-charge kaba la leh ha ka por jong u Prof Shukla kaba long hakhmat duh.
Ka seng ka la kyntu ïa u Acting VC ban khmih bniah ïa kane ka mat bad ban shim ïa ki sienjam kiba dei nangne shakhmat na ka bynta ka jingïaid beit jong ka skulbah.
U Prof Barik ula pynthikna ïa kane ka kynhun ba yn sa rah ïa katei ka mat ha ka jingïalang jong ka Executive Council ba kan ïoh bishar bniah ïa kine ki mat.
Shuh shuh ka union ka la banjur ruh ïa ka jingdonkam ban pynkhie im ïa ka Convocation jong ka skulbah ïa kaba ym shym la pynlong shuh mynta la 3 snem naduh ki por ba mih ki kynrum kynram.
Na ka liang u Bah Martin Warjri ula ong ba ka long kaba kongsan ban pynthikna ba ki samla kin ïoh pdiang ïa ka Degree ha ka jingïalang bad ba ïa katei ka rukom leh dei ban bteng biang ha kine ki snem ban wan.
U Prof Barik ula pynpaw ba un sa shimkhia ban pynlong ïa ka Convocation hapoh jong u bnai Nohprah mynta u snem.
La ïathuh ba ka jingïakren ka la long ruh halor ka jingduna ki nonghikai bad ki nongtrei ha kane ka jaka pule.
Ka NEHUSU ka la kdew ba katei ka jingduna ka la pynmih ïa ka jingeh kaba khraw ïa ki nonghikai ha kaba uwei u nonghikai un hap ban peit ïa ki spah ngut ki samla pule bad wat ka rukom treikam trei jam ruh ka la shah ktah lut.
Na ka liang u Acting VC ula pynthikna ba ki bor pynïaid kin sa khmih bniah ïa ka jingdonkam ïa ki nonghikai bad ki nongtrei.
Shuh shuh ki samla pule ki la kyntu ïa ki bor kiba dei khmih ban pynthikna ba dei ban pynlong ha ka por kaba la buh ïa ka jingpdiang ïa ka admission ha une u snem uba mynta, namar ha ki snem kiba la dep kala don ka jingslem ha kaba ïadei bad kane ka bynta. Kila pynpaw ruh ïa ka jingthylli ki kam ha ki kyrdan kiba heh jong ka skulbah ha kine ki ar snem kiba la dep bad kila dawa ba dei ban shim mardor ïa ki sienjam ban pyndap ïa kitei ki kyrdan ban pynthikna ba ka rukom treikam kan long kaba ïaid beit khlem kano kano ka jingthut.
Haba pynpaw ka jingkmen, u Bah Martin Warjri ula ong, ba u Acting VC u long uba kloi ban ïakren na ka bynta ka bha ka miat jong ka skulbah bad ula ai ka jingkular ban shimkhia ïa ki jingeh kiba la pynsngew da ka Union.