Shillong, Naitung 27: Ar ngut ki samla ki la khlad noh hadien ba ka scooty ba ki shong ka la shah tynrah ha kawei ka kali kaba ym pat lah ban ithuh ha Golflink ha ka miet Sngi U Blei kaba la pynlong ïa ki pulit ban pynlong ka jingthwet kaba jur ban lap dien ïa u nongniah uba la phet krad noh na katei ka jaka ba la jia.
Haba kren bad ki lad pathai khubor, u Superintendent of Police ka East Khasi Hills, Bah Vivek Syiem u la ong ba kine ki arngut ki lanot ki kynthup ïa uwei u samla shynrang uba 18 snem bad kawei ka samla kynthei kaba 17 snem.
“Ïa kine ar ngut la pynkit mar mar sha Civil Hospital, hynrei ki doktor ki la pynbna ba ki la khlad lypa. Uwei u dei na Mawpun bad kawei pat na Pynthor,” ong u Bah Vivek Syiem haba kren sha ki lad pathai khubor ha ka sngi Nyngkong.
Ïa kiba la khlad la ithuh kum u Benjamin Shabong (18) na Mawpun bad ka Fabela Grace (17) na Pynthor.
Ki Pulit ki la ong ba ki la poi ha ka jaka ba jia tang hapoh san minit hadien ba la pyntip sha ki.
“Dei manga nyngkong eh ba la ïoh jingtip bad nga la pyntip mar mar sha ki Pulit ka Pasteur Police Station bad ka Sardar Traffic Branch bad ma ki ruh ki la poi ha ka jaka tang hapoh san minit,” la ong u SP.
Ki Pulit ki la register ïa ka Unnatural Death (UD) case bad ki dang pynlong ïa ka jingtohkit ban lap dien ïa ka kali kaba la don bynta ha kane ka jingjia.
“Ngi dang pyrshang ban lap ïa ka kali kaba la don bynta ha kane ka jingjia. Tang shu lah ban ithuh ïa ka, ngin kem noh ïa u nongñiah,” la ong u SP
U la ong ruh ba ki Pulit kin bishar bniah ïa ka kaiphod post-mortem ban tip la kiba shong ha ka scooty ki la dih kyiad ne em bad ka jinglong husiar jong ki ha ka por ba jia ka jingjia. Ha kajuh ka por, la ïathuh ba ka Traffic Police kan pynlong ïa la ka jong ka jingtohkit ban lap mano ba dei hok ban kitkhlieh.
Katkum ka FIR, u SP u la ong ba u nongñiah uba la tynrah u dei ban pynsangeh ïa ka kali bad ban aiti noh ïa lade sha ki Pulit. Hynrei namar ba u la phet na ka jaka ba jia ka jingjia, ka pyni ba u la leh bakla.
“Ngi la register case pyrshah ïa u nongñiah bad ruh pyrshah ïa ka kali kaba la don bynta. Ngin dang bteng ïa ka jingtohkit bad ngin sa lap ïa ka kali,” la ong u SP
