Imphal, Naitung 25: U Myntri Rangbah ka Meghalaya bad National President ka National People’s Party (NPP) u Conrad K. Sangma ha ka Sngi Thohdieng ula ïakynduh ïa u Myntri Rangbah ka Manipur u Khemchand Yumnam Singh, ha ryngkat bad arngut ki Nongïalam kaba pynskhem biang ïa ka jingkut jingmut na baroh arliang ban wanrah ïa ka roi ka par, ka suk ka saiñ kaba neh bad kaba kynthup lang ïa baroh.
ïa u Conrad la synran da u President ka NPP Manipur u Dr. Lorho S. Pfoze, u Myntri sorkar Kh. Loken Singh, bad MLA ka NPP ha ka jingleit ïakynduh ïa u Myntri Rangbah hapoh ka ïingsah jong u.
Haba shim ïa ka jingïakynduh kum kaba sngewtynnad bad seisoh bha, u Khemchand ula pdiang sngewbha ïa ka Kynhun ka NPP bad ïakren ruh halor kiba bun ki kam kiba ïadei bad ka Jylla.
Ha kane ka jingïakynduh, ka Kynhun ka NPP ka la aiti ïa ka dorkhast kaba batai ïa ki jingangnud bad ki kam ba hakhmat eh ka party. U Khemchand ula pynpaw ba ïa kine ki jingai jingmut un sa buh hakhmat eh ban shong pyrkhat.
“Nga ngeit skhem ba ngin ïai bteng ban burom ïa ki nongrim ka jingïatreilang bad ka thong na ka bynta ka roi ka par kaba neh bad ba kynthup lang ïa baroh” ong u Khemchand hadien ka jingïalang.
Kane ka jingïakynduh ka la wan jia hashuwa jong ka Convention ba shisien shisnem jong ka NPP ha Manipur bad la ïohi ruh ïa ka kum ka jingïakren saiñ pyrthei kaba kongsan hapdeng ki Nongïalam bad ka Sorkar Jylla, da kaba phaikhmat sha ka jingpynkhlaiñ ïa ka jingïatrei lang bad ka roi ka par.
