Nga ïeng ryngkat bad ki Samla Pule ba ïakhih da ka jingjai jai ha Delhi : MLA ka Mawryngkneng

Shillong, Naitung 24 : U MLA jongka Mawryngkneng u bah Heavingstone Kharpran u la pynpaw ba u ïeng ryngkat bad ki samla pule kiba pynpaw da ka jingjai jai ïa ka sur jong ki halor ki mat kiba ktah ïa ka pule puthi, ka lawei bad ka burom jong ki. “ Ngi im ha ka ri synshar paidbah, ha kaba dei ban shah shkor ïa ka sur jong ki paidbah,ym dei ban pynshitom ne ban khanglad ïa ka. Baroh kiba don bynta ha kane ki dei ban shim ïa ka jingkitkhlieh. Man la kawei pa kawei ka khajna kaba la shim kum ka bai rung skul ne kolej ka dei ka jingkitkhlieh jong ka Sorkar baroh kawei ban pyndonkam hok ïa ka” ong u bah Kharpran.
Ki kmie ki kpa ki shim ram ban pynïoh jingpule ïa ki khun, bad ki samla pule ruh ki hap ban kit ïa kane ka jingeh bad jingkhia. Kumta, ki don ka hok ban pynpaw ïa ki jingeh bad jingsngewkhia jong ki, namar kane ka ïadei ym tang bad ka lawei jong ki, hynrei ruh bad ka mynnor bad ka mynta jong ki.
“ Nga kyntu ïa ka Sorkar bad ïa ki bor ba dei peit ba kin ïakren bad ki samla pule da ka mynsiem kaba shisha bad kaba tei. Dei ban pynbeit bad jubab ïa ki jingeh jong ki da ka rukom kaba shai bad kaba khuid, bad ban pynthikna ba yn ym don uwei ruh u samla pule uba shah byrngem, shah pynbor ne shah pyntieng tang namar ba u la shim bynta ha kane ka jingïakhih kaba jai jai bad kaba long katkum ka hok synshar paidbah” ong biang u bah Kharpran.
Ka jingkitkhlieh kum ki nongmihkhmat paidbah ka long ban shah shkor, ban ïada ïa ki hok synshar paidbah, bad ban trei ban wanrah ïa ki lad jingïa pynbeit kiba tei bad kiba myntoi ïa ki samla pule.
Ha kane ka bynta, ka Meghalaya ka donkam ban wanrah ïa ka Education Policy kaba skhem, kaba shai bad kaba ïada ïa ka pule puthi bad ka lawei jong ki samla pule, khnang ba kum kine ki jingeh kin ym mih biang bad ba ka pule puthi ha ka jylla kan ïaid shakhmat da ka jingkit khlieh, ka jingshai bad ka jingïada ïa ka hok jong baroh.